Թշնամին ուղիղ գծով 3-4 կմ է հեռու. սեպտեմբերյան ռազմագործողություններից հետո անվտանգային խնդիրներն ավելի են խորացել. Սեյրան Զաքարյան

Սյունիքի մարզի Ծավ գյուղում գյուղատնտեսական աշխատանքները դեռ չեն մեկնարկել. եղանակային պայմանները թույլ չեն տալիս։ Վարչական ղեկավար Սեյրան Զաքարյանը «Փաստինֆո»-ի հետ զրույցում հույս հայտնեց, որ կկարողանան գոնե գյուղի տարածքում գտնվող, թշնամու կողմից չդիտարկվող հողակտորները մշակել։

«Թշնամին ուղիղ գծով մեր տներից 3-4 կմ է հեռու, բայց արանքում անտառներ են, դրա համար էլ, կարծում եմ, որ կկարողանանք մշակել։ Ցորեն, գարի չենք ցանի, քանի որ բարենպաստ չեն պայմանները դրանց համար, բայց կարտոֆիլ ու բանջարեղեն կցանենք։ Գյուղից հեռու էլ հողատարածքներ ունենք, բայց այնտեղ հասնելը խնդիր է. ճանապարհ չկա, անանացանելի է։ Համապատասխան մարմինները քաջատեղյակ են խնդրին»,-ասաց Զաքարյանը՝ հույս հայտնելով, որ աշխատանքներ կտարվեն, որպեսզի այդ տարածքները ևս հնարավոր լինի մշակել։

Գյուղի վարչական ղեկավարը շեշտում է՝ 44-օրյա պատերազմից հետո բնակիչները կտրուկ կրճատել են խոշոր եղջերավոր անասունների քանակը, սեպտեմբերյան ռազմագործողություններից հետո, երբ անվտանգային խնդիրներն ավելի են սրվել, նաև մանր եղջերավորների գլխաքանակն է կրճատվել։

«Բացի այն, որ արածացնելու հարմար տեղ չկա, միսն էլ են դժվարությամբ իրացնում մարդիկ։ Գյուղում սպանդանոց չկա, անասուններին պետք է հասցնել Կապան։ Դրա համար էլ թշնամու կողմից դիտարկվող 35 կմ ճանապարհը պետք է անցնել։ Այսինքն՝ անասնապահությունը, որը նախքան պատերազմը գյուղացիների հիմնական զբաղմունքն էր, այլևս նպատակահարմար չէ»,-նշեց վարչական ղեկավարը։

Զաքարյանը շեշտում է՝ անվտանգային իրավիճակը մտահոգիչ է. երիտասարդությունը գյուղում է, ոչ ոք գյուղը չի լքել, բայց բոլորն են գիտակցում, որ հանգիստ կարող են ապրել միայն այն պարագայում, երբ թշնամին հետ կշպրտվի մեր տարածքներից։

«Հասկանալի է, որ ադրբեջանցիներին պետք է հետ շպրտել, բայց ո՞վ կանի դա։ Իհարկե, մենք պիտի անենք, ուրիշը չի անելու, ուղղակի, կարծում եմ, որ ներկա դրությամբ հնարավորություն չունենք դա անելու»,-ասաց Զաքարյանը։

Հիշեցնենք, որ հատկապես 2021թ․ նոյեմբերից հետո, երբ ադրբեջանցիները, ներխուժելով Հայաստանի սուվերեն տարածք, անցակետ ու մաքսակետ դրեցին Կապան-Ճակատեն ճանապարհահատվածի վրա, անվտանգային նոր խնդիրներ ստեղծեցին Կապան համայնքի Շիշկերտ, Ծավ, Սրաշեն, Ներքին Հանդ, Ճակատեն գյուղերի բնակիչների համար՝ նրանց զրկելով նաև հիմնական ճանապարհից օգտվելու հնարավորությունից։