Ժաննա Անդրեասյանը՝ աշակերտներին Կապան տեղափոխող ավտոբուսի վթարի մասին (video)

Այս պահին կոնկրետ բուհերի միավորման հարց չի քննարկվում։ Այս մասին այսօր՝ մարտի 16-ին, լրագրողների հետ զրույցում ասաց ԿԳՄՍ նախարար Ժաննա Անդրեասյանը։

«Առաջիկայում կներկայացնենք ակադեմիական քաղաքի ստեղծման կառույցի նախագիծը, եւ կլինի հստակ կառույց, որը կզբաղվի ծրագրի մշակման, նախագծման եւ իրականացման աշխատանքներով։ Հստակեցված է՝ որտեղ պետք է տեղակայված լինի ակադեմիական քաղաքը։ Գույքային հարցերը պարզաբանելու գործողությունների համար կառույց կստեղծվի։ Ըստ ծրագրի՝ մենք պետք է ունենանք ութ բուհ, այսինքն՝ պետք է ունենաք բուհերի խոշորացում, ինչպես դա տեղի կունենա, ինչ տրամաբանությամբ, առանձին գործընթաց է, որով մենք դեռեւս չունենք կոնկրետություն»,- նշեց Ժաննա Անդրեասյանը։

Ժաննա Անդրեասյանը, անդրադառնալով Օխտարի միջնակարգ դպրոցի աշակերտներին Կապան տեղափոխող ավտոբուսի վթարին, նշեց, որ ավտոբուսը տրամադրված չի եղել ԿԳՄՍ-ից։ Այժմ կատարվում է ամբողջական վերլուծություն հասկանալու, թե տրանսպորտային ծառայություններն ամբողջ երկրով ինչպես են կատարվում։

«Անկախ այն բանից՝ ծնողներն են կազմակերպում տեղափոխումը, թե ինչ-որ կազմակերպություններ, հստակ չափանիշներ պետք է լինեն, օրինակ՝ պետք է մեքենան կցված լինի կոնկրետ մեկ վարորդի, լինի տեխզննություն։ Անելու ենք ամենը, որ նման դեպքերը չկրկնվեն։ Ամեն օր մենք ապահովում ենք ավելի քան 3000 երեխաների եւ 1500 ուսուցիչների տեղափոխությունը։ Այժմ այդ դպրոցում մենք մեկ շաբաթ շուտ ենք արձակուրդ տրամադրել՝ հաշվի առնելով նրանց հոգեբանական վիճակը եւ ապաքինման խնդիրը։ Այնտեղ այս բոլոր աշխատանքներն ընթացքում կիրականացնեն»,- ընդգծեց նախարարը։