ԳԱԱ գիտաշխատողների մոտ 10 %-ը կկրճատվի, բնական գիտությունների որոշ ինստիտուտներ կմիավորվեն. armtimes.com

ՀՀ գիտությունների ազգային ակադեմիայում (ԳԱԱ) դեռեւս պաշտոնապես չեն խոսում այն մասին, թե համակարգում ինչ փոփոխություններ ու օպտիմալացում է նախատեսվում` հատարարելով, որ այդ հարցում հստակություն կարող է լինել մինչեւ սեպտեմբերի վերջը: Միավորումների ճանապարհով գնալու հռչակված նպատակը գիտության արդյունավետության բարձրացումն է, եւ դեռ ամիսներ առաջ մեկնարկել էր ԳԱԱ համակարգի գիտական կազմակերպությունների գործունեության արդյունավետության գնահատման գործընթացը:Այդուհանդերձ, օպտիմալացման ուղղությամբ կատարվելիք որոշակի քայլեր արդեն իսկ ուրվագծվում են: Մեզ հաջողվեց պարզել, որ քննարկվում է միավորել ԳԱԱ բնական գիտությունների բաժանմունքի կազմում գործող որոշ ինստիտուտներ:Փոփոխություններ են հնարավոր նաեւ Հայագիտության եւ հասարակական գիտությունների բաժանմունքում: Այս դեպքում խոսքը ներքին օպտիմալացման մասին է: Նախատեսվող փոփոխությունները կլինեն թե´ ներքին, երբ կմիավորվեն առանձին բաժիններ կամ լաբորատորիաներ, եւ թե´ արտաքին, երբ կմիավորվեն այս կամ այն ինստիտուտները:  Մենք պարզեցինք նաեւ, որ ԳԱԱ ինստիտուտներից ակնկալվում է միավորման վերաբերյալ առաջարկները գնահատման հանձնաժողովին ներկայացնել մինչեւ սեպտեմբերի կեսը: Իսկ արդեն 2018 թվականի մարտին օպտիմալացման գործընթացը պետք է ավարտված լինի:Տեղեկություն կա նաեւ, որ հաջորդ տարի ԳԱԱ համակարգում իրականացվելու է գիտաշխատողների մոտ 10 տոկոս կրճատում: Նշենք, որ 20 գիտնական աշխատանքից ազատվել էր այս տարվա սկզբին: