Սա կործանման ճանապարհ է

Արցախի ոստիկանությունը երեկ հաղորդեց, որ ադրբեջանական դիվերսիոն խումբը «Խայփալու» կոչվող տեղանքում՝ Ստեփանակերտի Կրկժան թաղամասից դեպի Լիսագոր գյուղ ընկած հատվածում, թիրախավորել և կրակ է բացել ոստիկանության անձնագրային և վիզաների վարչության անձնակազմի հերթափոխի մեքենայի վրա։ Հայկական կողմը հաղորդեց երեք զոհի, մեկ վիրավորի մասին:

«Ոստիկանության ծառայողները երթևեկում էին մարդատար մեքենայով՝ Արցախի կողմից դեպի մեր ոստիկանական կետը, մեքենայում զենք, զինամթերք կամ ռազմամթերք չի եղել ընդհանրապես», - սա Արցախի պաշտոնական հերքումն է ադրբեջանական պաշտպանական գերատեսչության տեղեկությունը, թե ոստիկանության մեքենաներով երեկ Հայաստանից Արցախ փորձ է արվել ռազմամթերք տեղափոխել։

Դա բացահայտ սուտ և միջազգային հանրությանը մոլորեցնելու, խաբելու փորձ է, երեկ հայտարարել է հայտարարել է պետնախարար Գուրգեն Ներսիսյանը. «Տեղի ունեցած դեպքի հանգամանքների վերաբերյալ Արցախի Հանրապետության իրավասու մարմինները ունեն անհերքելի ապացույցներ, տեսագրություններ ու լուսանկարներ, որոնք ամենակարճ ժամկետում մեր արտաքին գործերի նախարարության միջոցով կներկայացվեն միջազգային լսարանին»։

Եվ այսպես, երեկ 10։00-ի սահմաններում ադրբեջանական դիվերսիոն խումբը ներթափանցեց Արցախի տարածք և զինված հարձակում գործել ոստիկանության անձնագրային և վիզաների վարչության անձնակազմի հերթափոխի մեքենայի ուղղությամբ, որի հետևանքով ոստիկանության 3 ծառայող զոհվեցին, մեկը ծանր վիրավորումով տեղափոխվեց հիվանդանոց ու գտնվում է բժիշկների վերահսկողության տակ։
Պետնախարար Ներսիսյանը շեշտել է նաև, որ վերջին օրերին Ադրբեջանի զինված ուժերը ակտիվություն են ցուցաբերել շփման գծի տարբեր ուղղություններով, թիրախավորել են հայկական բնակավայրերի անվտանգությունն ապահովելու նպատակով տեղադրված տեսախցիկները, վնասել կամ ոչնչացրել դրանք։

Սա Ալիևի պատասխանն է Փաշինյանի «խաղաղության օրակարգին»: Ալիևն ցույց է տալիս, որ չի ենթարկվելու նաև ՄԱԿ-ի միջազգային դատարանի վճռին նույնպես, ինչպես չի կատարում նաև Նոյեմբերի 9-ի հայտարարության պահանջները:

Սա Ալիևի պատասխանն է միջազգային հանրությանը: Ու նրա պատասխանի հիմքում ընկած է Փաշինյանի մեղքը:

Ո՞րն է Փաշինյանի իշխանության դիրքորոշումը... «Խաղաղության հաստատում», այն էլ այս ձևակերպմամբ` «լուծումը պետք է ընդունելի լինի նաև Ադրբեջանի համար»:
Եվ ահա, Ալիևն էլ պարտադրում է իր լուծումն` անշեղորեն:

Հարավային Կովկասի և Վրաստանի ճգնաժամի հարցերով ԵՄ հատուկ ներկայացուցիչ Տոյվո Կլաարը մեկնել է Ադրբեջան։ Նա հանդիպումներ կունենա Բաքվում՝ բարձր մակարդակի կանոնավոր խորհրդակցությունների շրջանակում։ Թվիթերում նա գրել է, որ ակնկալում է բովանդակալից հանդիպումներ Ադրբեջանի ղեկավարության հետ՝ Մյունխենի հանդիպումներից հետո խաղաղ գործընթացն առաջ մղելու համար։

Կլաարը մոտ տասն օր առաջ Հայաստանում էր։ Հանդիպումներ է ունեցել Հայաստանի վարչապետի, Անվտանգության խորհրդի քարտուղարի, արտգործնախարարի հետ: Նրա այցին նախորդել էր Մյունխենում Փաշինյանի ու Ալիևի վերջին հանդիպումը՝ ԱՄՆ պետքարտուղարի նախաձեռնությամբ։

Կլաարը հայտարարել է, թե Լեռնային Ղարաբաղում այսօր տեղի ունեցած «մահացու միջադեպն ընդգծում է բանակցություններն առաջ մղելու հրատապությունը»:

«Վերադարձել եմ Բաքու: Անհամբեր սպասում եմ Ադրբեջանի իշխանությունների հետ առարկայական բանակցությունների` առաջ տանելու խաղաղության գործընթացը` Մյունխենում տեղի ունեցած հանդիպումներից հետո», - Թվիթերում գրել է եվրոպացի բարձրաստիճան դիվանագետը:

Կովկասյան բանակցային գծով ավագ խորհրդական Լուիս Բոնոն այսօր ժամանել է Բաքու։ Ըստ դեսպանության՝ Բոնոն Բաքվում է՝ Հայաստանի և Ադրբեջանի միջև խաղաղ գործընթացն առաջ մղելու նպատակով։ «Բոնոն կընդգծի ԱՄՆ-ի աջակցությունը խաղաղ գործընթացին նոր ուշադրությանը, այդ թվում՝ ուղիղ երկխոսության միջոցով», - ասված է հաղորդագրությունում: Կովկասյան բանակցային գծով ավագ խորհրդականը կլինի նաև Հայաստանում և Վրաստանում: Նա Բաքվում արդեն հանդիպել է Իլհամ Ալիևի հետ:

Որն է միջազգային հանրության պատասխանը Ալիևին: Բացի կոչերից` որևէ նշանակալի քայլ նույնպես չի արվում Ալիևի ագրեսիվ կեցվածքին վերջ տալու նպատակով:

Ռուսաստանն է գործնականում Արցախում իրավիճակի պատասխանատուն և արցախահայության անվտանգության պաշտպանը, սակայն մյուս կողմից Մոսկվան ձգտում է այս փուլում բացառել Արևմուտքի աջակցությամբ կազմակերպված Հայաստան-Ադրբեջան բանակցությունները, հնարավոր պայմանավորվածությունները:
Այս բարդ աշխարհաքաղաքական գործընթացներում Հայաստանի ու Արցախի քաղաքացիները զրկված են հայկական պետականությունը պաշտպանող իշխանություն ունենալու հնարավորությունից:

Ու սա կործանման ճանապարհ է...

Մետաքսյա Շալունց