Իսկ Սոչիում գիշերները խաղաղ էին

Սոչիում կայացել է Սարգսյան-Պուտին հանդիպումը: Նրանք քննարկել են հայ-ռուսական երկկողմ և բազմակողմ ձևաչափով հարաբերությունների օրակարգին և համագործակցությանը վերաբերող հարցեր, անդրադարձել Նախագահ Սերժ Սարգսյանի այս տարվա մարտին Ռուսաստան կատարած պաշտոնական այցի ընթացքում ձեռքբերված պայմանավորվածությունների իրագործման ընթացքին: Սերժ Սարգսյանն ու Վլադիմիր Պուտինը անդրադարձել են նաև ԵԱՏՄ և ՀԱՊԿ շրջանակներում զարգացող ինտեգրացիոն գործընթացներին, մտքեր փոխանակել միջազգային և տարածաշրջանային արդիական հարցերի, այդ թվում՝ Լեռնային Ղարաբաղի հակամարտության կարգավորման շուրջ: «Հայաստանի և Ռուսաստանի՝ որպես երկու ինքնիշխան պետությունների միջև հարաբերությունները շատ լուրջ կերպով ամրապնդվել են: Պահպանվում է ինտենսիվ քաղաքական երկխոսություն, ընթանում է երկկողմ համագործակցություն և՛ տնտեսական, և՛ անվտանգության, և´ ռազմական ոլորտներում: Մենք ակտիվ փոխգործակցում ենք միջազգային կազմակերպությունների և մեր ինտեգրացիոն միավորումների շրջանակներում»,- ասել է ՌԴ նախագահ Վլադիմիր Պուտինը: Իր հերթին Սերժ Սարգսյանն ասել է. «Հայ-ռուսական ռազմավարական դաշնակցային հարաբերություններն առանձնանում են բարձր մակարդակում մշտական ինտենսիվ երկխոսությամբ, արտաքին քաղաքական լայն համակարգմամբ, միջազգային և տարածաշրջանային հարթակներում արդյունավետ համագործակցությամբ, անվտանգության, ռազմական և ռազմատեխնիկական ոլորտներում արգասաբեր համագործակցությամբ: Մեր առևտրատնտեսական հարաբերությունները ինտենսիվ կերպով զարգանում են: Անցած տարի մենք ունեցանք առևտրաշրջանառության 15 տոկոսանոց աճ: Այս տարվա առաջին վեց ամիսների ընթացքում այն ավելացել է գրեթե 24 տոկոսով: Մշտական է մեր երկրների կառավարությունների ու խորհրդարանների միջև կապը: Մշտապես զարգանում է նաև միջտարածաշրջանային և հումանիտար ոլորտներում համագործակցությունը...»: Ի սկզբանե, հայտնի էր, որ Սարգսյանն ու Պուտինը Բարձր մակարդակի բանակցությունների ժամանակ անդրադառնալու են ԵԱՏՄ և ՀԱՊԿ շրջանակներում համագործակցության զարգացման հեռանկարին առնչվող հարցերին, ինչպես նաև կարծիքներ են փոխանակելու միջազգային և տարածաշրջանային հարցերի, այդ թվում՝ Լեռնային Ղարաբաղի հակամարտության կարգավորման շուրջ: Տարօրինակ է, որ ԼՂ խնդրի վերաբերյալ առավել մանրամասն հայտարարություններ չարվեցին Սոչիում: Սարգսյանն ու Պուտինը քննարկելու հարցեր ունեն ԼՂ խնդրում, քննարկելու շատ բան կա` մինչև այս տարվա վերջ նախատեսվում է Սարգսյան-Ալիև հանդիպում կազմակերպել: Պուտինն ավելի վաղ արդեն հանդիպել է Ալիևին` կրկին Սոչիում ու «բողոքել» է, որ Ալիևը «խնդիր» է, որի հետ շտապում էր հանդիպման: Ինչ էլ խոսել, պայմանավորվել են Պուտինն ու Ալիևը, դրանք վստահաբար քննարկվել է նաև Սարգսյան-Պուտին հանդիպմանը` ԼՂ խնդրով: Արևմուտք-Ռուսաստան հարաբերությունները կարող են անդրադառնալ ԵԱՀԿ Մինսկի խմբի, առանց այն էլ, բարդ գործունեության վրա, այն առումով, որ թե՛ ԱՄՆ-ն, թե՛ ՌԴ-ն կարող են Հայաստանի ու Ադրբեջանի հետ սեպարատ աշխատել, իսկ դա կնշանակի նոր ինտրիգներ, նոր խմորումներ: Բացի այդ, Հայաստանի հետ քննարկելու այլ հարցեր էլ կան` Հայաստանում առկա դժգոհությունները Ռուսաստանի կողմից Ադրբեջանի շարունակ զինելու, Հայաստանում հակառուսական որոշակի տրամադրությունները, որոնք ակնհայտորեն չեն գոհացնում որոշ ռուս փորձագետների ու մեկնաբանների: Պակաս կարևոր չէ Հայաստանի տարածաշրջանային կարևորության հարցը: Իրանը, Չինաստանը, նույնիսկ Իսրայելը որոշ քայլերով ցույց տվեցին, որ հետաքրքրված են Հայաստանով: Իսկ, սա գուցե, չի մտնում Ռուսաստանի «պլանների» մեջ: Եթե այս ամենին էլ գումարենք նոյեմբերին սպասվող Հայաստան-ԵՄ նոր փաստաթղթի ստորագրումը, ապա կարելի է ենթադրել, որ Սարգսյան-Պուտին հանդիպումը առավել քան բազմաբովանդակ է եղել: Այնպես որ, Սոչիի խաղաղությունը, կարող է թվացյալ ու խաբուսիկ լինել, կամ`ժամանակավոր անդորր փոթորիկից առաջ: Առաջիկա օրերին, շաբաթներին Սարգսյան-Պուտին հանդիպման «արդյունքներն» ավելի տեսանելի կդառնան` թե՛ ներհայաստանյան իշխանական դաշտից, թե՛ հյուսիսից փչող «քամիներով»: Մետաքսյա Շալունց