Երևանում 55-ամյա վարորդը Lexus-ով վրաերթի է ենթարկել փողոցը չթույլատրելի վայրով անցնող հետիոտնին

Այսօր՝ օգոստոսի 26-ին, վրաերթ է տեղի ունեցել Երևանում։ Ժամը 11։50-ի սահմաններում Վանաձոր քաղաքի բնակիչ՝ 55-ամյա Գևորգ Թումանյանը Ավետ Ավետիսյան փողոցում իր վարած Lexus մակնիշի 26 ՕՏ 215 համարանիշի ավտոմեքենայով վրաերթի է ենթարկել փողոցը չթույլատրելի հատվածով անցնող հետիոտնին։ Ինչպես դեպքի վայրից հայտնում է ֆոտոլրագրող Գագիկ Շամշյանը, վարորդը փախուստի չի դիմել, օգնել է վրաերթի ենթարկվածին, ով փողոցն անցնելիս է եղել չթույլատրելի հատվածով, տեղափոխվել «Էրեբունի» բժշկական կենտրոն, որից հետո վարորդն ահազանգել է ՃՈ օպերատիվ կառավարման կենտրոն։ Դեպքի վայր են ժամանել Ճանապարհային Ոստիկանության 1-ին սպայական գումարտակի 1-ին դասակի ավագ տեսուչ Էդգար Մկրտչյանն ու տեսուչ Արթուր Հովհաննիսյանը։ Դեպքի մասին ՃՈ օպերատիվ կառավարման կենտրոնի պատասխանատու հերթապահ Միքայել Աղաբեկյանը տեղեկությունը փոխանցել է Ճանապարհային ոստիկանության Ճանապարհատրանսպորտային պատահարների գործերով հետաքննության և վարչական վարույթի իրականացման բաժանմունք, որտեղից ժամանել է հետաքննիչ Հրանտ Աբրահամյանը, ում կողմից փաստի առթիվ նյութեր են նախապատրաստվում։ Ոստիկանությունը պարզում է վրաերթի ենթարկվածի ինքնությունը։ Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով: