Ցմահ դատապարտյալների հարազատների բաց նամակը նախագահին

Մեծարգո պարոն Նախագահ, մեծ հույսով ու հավատով ձեզ են դիմում մի խումբ ծնողներ ու հարազատներ՝ մահապատժի դատապարտված, իսկ այնուհետև <<ներված>> ու ցմահ դատապարտվածների ծնողներ ու հարազատներ։ Մենք երկու տասնամյակից ավելի տեսել ենք բազմաթիվ անարդար որոշումներ ու սուտ խոստումներ՝ տրված տարբեր պետական կառույցների պաշտոնյաներից՝ սկսած նախկին նախագահ պարոն Ռ․Քոչարյանի <<ներումից>> մինչև այսօրվա արդարադատության ոլորտի բոլոր կառույցներից, որոնց երբևէ չի հետաքրքրել, թե ինչ են զգում դատապարտյալների հարազատներն իրենց ամեն մի սուտ դուրս եկած խոստումից հետո։ Ինչեր ասես, որ չեն խոստացել ու ստել․ գործերի վերանայում, ներում, վաղաժամկետ ազատման հնարավորություն և այլն, բայց․․․ Մեր երկրում իրավական լուրջ խնդիր կա, որը պահանջում է անհապաղ լուծում, քանի որ ցմահ դատապարտյալների թիվը ամսեամիս նվազում է նրանց առողջական վատ վիճակի պատճառով։ Եվ այդ իրավական խնդիրը ունակ եք լուծելու միայն Դուք։ Մենք կարծում էինք, որ 2017թ․ հուլիսի մեկին ուժի մեջ մտած վաղաժամկետ պայմանական ազատման մասին օրենքը գոնե սայլը տեղից կշարժի, բայց դա էլ էր խաբեություն։ Վերջապես ինչու՞ օրենքը չի գործում, ինչու՞ պայմանական վաղաժամկետ չեն ազատվում, ինչու՞ ներում չի շնորհվում։ Ինչու՞ ՀՀ-ը ցույց չի տալիս ամբողջ աշխարհին, որ մեր երկրում գործում է օրենքը, որ մենք ունենք արդարադատություն։ Ք․Կ․Հ-ի կողմից լավ բնութագրեր ստացած դատապարտյալներին վաղաժամկետ ազատման անկախ, <<անկողմնակալ ու անաչառ>> հանձնաժողովի անդամները որակում են <<ոչ պատշաճ վարքագիծ>> ունեցողների, ինչը շատ չի տարբերվում նախորդ որակումից՝ <<բարձր ռիսկայնություն>> ունեցող։ Այս անելանելի իրավիճակը ստիպում է մարդկանց գնալ ծայրահեղ ու անկանխատեսելի քայլերի, ինքնասպանության փորձերի։ Արդեն կան հոգեպես անկայուն ու խախտված անձինք, մահվան դեպքեր։ Այս խնդիրը լուծում է պահանջում, կտրուկ քայլեր, հստակ դիրքորոշում։ Հարգարժան պարոն Նախագահ, Դուք մեր միակ հույսն եք, Ձեր ներումը միակ հնարավորությունն է մեր ընտանիքի անդամին նորից վերագտնելու ։ Խնդրում ենք լուծում տալ այս հարցին՝ միավորելով ու երջանկացնելով մի քանի տասնյակ ընտանիքների։ Հարգանքներով ՝ ցմահ դատապարտյալների հարազատներ