«Բուրժուադեմոկրատական հեղափոխություն»` Կարեն Կարապետյանի համար
«ԵԼՔ» խմբակցության ղեկավար Նիկոլ Փաշինյանը «Հայաստանը տնտեսական բումի նախաշեմին» վերնագրով հոդված է հրապարակել, որում խոսել է Հայաստանի տնտեսության ավանդական պատկերացումների` մոնոպոլիաների, օլիգարխներ, «դաբրոների» մասին, բացատրել դրանց գոյության պատճառները, հետևանքները` դրանք հայաստանյան տնտեսության թիվ մեկ բացասական խնդիրները ու ներդրումների հիմնական խոչընդոտը համարելով։ Ապա, նա ուշադրություն է հրավիրում մի ամբողջովին այլ Հայաստանի վրա, որը փաստորեն գոյություն ունի Հայաստանում... Նա պատմում է «հաջողության նոր պատմությունների» մասին, այսպես ասած` հաջողված գործարարների մասին, թե ինչպես են նրանք օլիգարխների աչքից հեռու բիզնես դրել ու պահում իրենց բիզնեսը. «Խնդիրն այն չէ, որ մինչ այս Հայաստանում հանգստյան տներ, «քոթեջներ» կամ գարեջրատներ ու գինետներ չեն եղել։ Խնդիրն այն է, որ վերը նշված և էլի մոտ երկու տասնյակ հայաստանյան ընկերությունների հետ շփվելիս հասկանում ես, որ գործ ունես գործարար մի նոր մտածողության, նոր տիպի հետ, որը չի փորձել ինչ-որ մեկի վարորդի հետ մտերմանալով, սրան-նրան քսվելով ինչ-որ բան անելու դաբրո ստանալ, այլ որոշել է կառուցել իր սեփական աշխարհը, որը մարդկանց համար իրապես գրավիչ կլինի ու հարմարավետ, և որի ստեղծման արդյունքում կսկսվի մի նոր արտագաղթ՝ օլիգարխների տնտեսական աշխարհից դեպի այս նոր, հարմարավետ ու լավատես տնտեսական աշխարհ»։ Փաշինյանը բացատրում է, որ այս մարդիկ, օրինակ, 40 տարի առաջ հեռացած լինելով Հայաստանից, մեկ էլ որոշել են վերադառնալ ու հայրենի գյուղում, ամայի մի տեղ ինչ-որ բան հիմնել. «Այս օրինակները, որոնք այսօր Հայաստանի տնտեսության կամ համախառն ներքին արդյունքի իմաստով մեծ կամ նույնիսկ փոքր տոկոս չեն կազմում, մի սաղմ են, որ բնականոն զարգանալու պարագայում կարող են փոխել Հայաստանի տնտեսական կլիման և իրավիճակը»։ Ահա, Փաշինյանը ցույց տալիս է իր «ելքը». «...վերը նկարագրված դաշտում կուտակված պոտենցիալը կարող է Հայաստանում տնտեսական բում հարուցել...»։ Թվում է, թե սա հայաստանյան սովորական իրականության մասին հոդված է, որտեղ նկարագրված են անհերքելի փաստեր: Հայաստանում «տնտեսական բում» կարո՞ղ է ապահովել: Կարող է` եթե ցանկություն ունենան իշխանությունները: Բայց ամենակարևոր հարցը դա չէ, այլ այն, որից խուսափել է Փաշինյանը. իսկ ո՞վ կարող է նման «տնտեսական բում» ապահովել` Սերժ Սարգսյա՞նը, որի իշխանավարման տարիներին, փաստորեն, որոշ գործարարներ կարողացել են հաստատվել, թե՞ Ռուսաստանից բերված-նշանակված Կարեն Կարապետյանը, որի «քաղաքական ապագայի» բումն է, թերևս, փորձում ապահովել Նիկոլ Փաշինյանը: Աշունը, փաստորեն, մեկնարկում է ուշագրավ, զարգացումներով... «ԵԼՔ» խմբակցության որոշ անդամներ չեն բացառում աշնանից ԵԱՏՄ-ից Հայաստանի դուրս գալու պրոցեսի սկիզբ ծավալել, իսկ Նիկոլ Փաշինյանը հանկարծ այդ ֆոնին հանդես է գալիս ԵԱՏՄ-ական և ԵԱՏՄ-ամերձ Կարեն Կարապետյանին Հայաստանում բիզնեսի «ծաղկման» պատասխանատու կարգելով և նրան, իրականում, իշխանություն նվիրելու հայտ է ներկայացնում: Ի՞նչ է անում Նիկոլ Փաշինյանը: Այն, ինչ չկարողացավ իրագործել Լևոն Տեր-Պետրոսյա՞նը` «բուրժուադեմոկրատական հեղափոխություն», բայց արդեն Կարեն Կարապետյանի քաղաքական ապագայի համա՞ր... Թամար Բագրատունի
Հետևեք մեզ Viber-ում
