ՀՀԿ-ական նախկին պատգամավոր Սուքիաս Ավետիսյանը առանձնատուն է կառուցում

«Հայկական ժամանակ» օրաթերթը գրում է. «2017 թվականի ապրիլի 2-ին տեղի ունեցած ԱԺ ընտրությունների ժամանակ բախտը չժպտաց որոշ պատգամավորների, ովքեր այդպես էլ չհայտնվեցին 6-րդ գումարման ԱԺ-ում: Նրանցից մեկն էլ գյումրեցի, ակտիվ ՀՀԿ-ական Սուքիաս Ավետիսյանն էր: Թեև նրա Գյումրիից չընտրվելն այնքան էլ զարմանալի չէր, քանի որ նա պատգամավորի պաշտոնը զբաղեցնում էր կուսակցության համամասնական ցուցակում զբաղեցրած իր հորիզոնականի շնորհիվ: «Armtimes.com»-ին տեղեկություններ էին հասել այն մասին, որ Ավետիսյանը բիզնեսով է զբաղվելու, թեև վերջինս մեզ հետ զրույցում հերքեց այդ տեղեկությունները: Այժմ նա ակտիվ շինարարությամբ է զբաղված` նոր առանձնատուն է կառուցում: Ավետիսյանը շինարարությունն իրականացնում է Գյումրիում` Մադոյան փողոցի իր մյուս տան դիմաց: «Armtimes.com»-ի այս տեղեկությունն Ավետիսյանը մեզ հետ զրույցում չհերքեց: Նրա հետ մեր զրույցն ամբողջությամբ ներկայացնում ենք ստորև. Պարոն Ավետիսյան, քաղաքականությունից դուրս եկա՞ք, ինչո՞վ եք այժմ զբաղվում: Հիմա զբաղվում եմ կուսակցական աշխատանքով: Իսկ ինչ-որ այլ աշխատանքի ցանկություն կամ մտադրություն ունե՞ք: Ցանկություն էլ կա, մտադրություն է կա… Իսկ առաջա՞րկ: Դեռևս կոնկրետ առաջարկ չկա: Իսկ ի՞նչ պաշտոն եք ցանկանում զբաղեցնել: Հիմա դրա ժամանակը չէ: Կլինի առաջարկ, կմտածեմ: Պարոն Ավետիսյան, խոսվում է, որ բիզնեսով եք զբաղվելու, ճի ՞ շտ է: Ճիշտն ասած` երբեք չեմ զբաղվել, ու մտադրություն էլ չունեմ: Պարոն Ավետիսյան, այս պահին Ձեր առանձնատան դիմաց, ինչ-որ նոր կառույցի շինաշխատանքներ է իրականացվում: Նոր առանձնատո՞ւն եք կառուցում: Նոր առանձնատուն չեմ կառուցում: Վաղուցվա իմ տան հիմքերի վրա տուն եմ կառուցում: Ինչպիսի՞ տուն է լինելու, երկհարկանի՞, կնկարագրե՞ք: Նորմալ, սովորական տուն է լինելու: Մարդու ապրելու համար` սովորական տուն: Պարոն Ավետիսյան, բնակարանի խնդիր ունե՞ք, որ նորն եք կառուցում: Ձեր առանձնատունը կիսակառույցի դիմաց է, չէ՞: Դիմացինն առանձնատուն չէ: Ընդհանուր բակի մեջ, ընդհանուր տուն է»: Մանրամասները՝ «Հայկական ժամանակ» թերթի այսօրվա համարում: