Էրդողանը կվճարի «ոսկե զուգարանակոնքի» գործի ծախսերը

Հինգշաբթի օրը Թուրքիայի առաջին ատյանի դատարանը երկրի նախագահ Ռեջեփ Թայիփ Էրդողանին պարտավորեցրել է փոխհատուցել «ոսկե զուգարանակոնքի» գործի ծախսերը: Այս մասին գրում է Today’s Zaman-ը` վկայակոչելով տեղի ԶԼՄ-ներին: Ինչպես նշում է պարբերականը` 2015-ի մայիսին ընդդիմադիր Ժողովրդական-հանրապետական կուսակցության առաջնորդ Քեմալ Քըլըչդարօղլուն հայտարարել է, որ 1000 սենյականոց նախագահական նստավայրում ոսկե զուգարանակոնքեր են: Էրդողանը հերքել է այդ տեղեկությունը` հրավիրելով Քըլըչդարօղլուին անձամբ համոզվել դրանում: Վերջինս սակայն մերժել է: «Առաջին ատյանի 27-րդ դատարանը վճռել է փակել «ոսկե զուգարանակոնքի» գործը առաջին լսման ընթացքում: Դատարանի վճռում ասվում է, որ ընդդիմադիր առաջնորդի մեկնաբանությունները կառավարական չափից դուրս ծախսերի քննադատություն են հանդիսանում և պետք է համարվեն որպես քաղաքական քննադատություն»,- գրում է պարբերականը: Դատարանը նախագահին պարտավորեցրել է վճարել դատարանի ծախսերն ու Քըլըչդարօղլուին փոխհատուցել փաստաբանի ծախսերը: