Ալիևին «խեղդում» են

ԵԱՀԿ Մինսկի խմբում ամերիկացի համանախագահ Ռիչարդ Հոգլանդը «Ամերիկայի ձայն»-ի հայկական ու ադրբեջանական ծառայություններին հարցազրույց է տվել, որում կարևոր ուղերձներ է հղել Ալիևին: «ԼՂ հակամարտության կարգավորման համար եկել է վստահության ամրապնդմանն ուղղված քայլերի կատարման ժամանակը»,- ասել է նա` հույս հայտնելով, որ առաջիկայում այդ ուղղությամբ որոշակի քայլեր կարվեն: «Գիտակցում եմ, որ այս պահին բարդ կլիներ հասնել ամբողջությամբ ապառազմականացման, չնայած որ դա շատ ցանկալի է: Սակայն մենք պետք է նվազեցնենք ռազմական բախումների հավանականությունը»,-ասել է ամերիկացի համանախագահը: Հոգլանդի խոսքով, առաջին հերթին անհրաժեշտ է սահմանամերձ և շփման գոտիներից հանել դիպուկահարներին և ավելացնել միջազգային դիտորդների թիվը, հատուկ սարքավորումներ տեղադրել: «Երբ երկու զինված կողմ բարդ տեղանքում միմյանց մոտ են գտնվում բախման միջադեպի հնարավորություն միշտ կա»,-ասել է նա: Այնուհետև Ռիչարդ Հոգլանդը նշել է, որ միջնորդները մեծ ակնկալիքներ ունեն Նյու Յորքում կայանալիք Հայաստանի ու Ադրբեջանի հանդիպումից, որին կարող է հետևել բանակցություններ երկու երկրների նախագահների մակարդակով: «Առկա է համապարփակ մի փաստաթուղթ, սակայն առկա են նաև դրան հասնելու քայլեր ու փուլեր: Հույս ունեմ, որ բարձրագույն մակարդակով հաջորդ բանակցությունների ընթացքում կողմերը լուրջ աշխատանք կկատարեն, և եթե վերջնական կարգավորմանը հնարավոր չլինի հասնել, կհայտարարեն որոշակի քայլերի մասին»,-ասել է դեսպանը, ավելացնելով, որ խնդրի կարգավորման հիմնաքարը փոխզիջումներ գտնելն է: Փաստացի, մի կողմից ամերիկացի համանախագահը նշում է, որ այժմ դժվար է խոսել Ղարաբաղյան հակամարտության գոտում լիակատար ապառազմականացումից, սակայն միևնույն ժամանակ նա հստակ արձանագրում է, որ պետք է դիպուկահարներին հետ քաշել շփման գծից, ավելացնել դիտորդների թիվը և տեղադրել հատուկ սարքավորումներ Ամերիկացի համանախագահի այս կոնկրետ քննադատությունը հասցեատեր ունի և դա Ալիևն է, որը մեկ տարուց ավելի է, ինչ միջնորդների հորդորներն ու կոչերն ուղղակի արհամարհում է: Ուշագրավ է, որ այնուհետև համանախագահը բավական նուրբ անցնում է կատարում` բաց խոսելով, որ գոյություն ունի հակամարտության լուծման շրջանակային փաստաթուղթ, սակայն լիարժեք փոխզիջման համար կողմերը պետք է պատկառելի աշխատանք կատարեն։ Այսինքն, նա հասկացնել է տալիս, որ մինչև Ալիևը չկատարի ստանձնած պարտավորությունները` հնարավոր չէ բանակցություններում առաջ գնալ: Ի դեպ, սա այն դիրքորոշումն է, որն արտահայտում է պաշտոնական Երևանը ապրիլյան պատերազմից հետո` պետք է վստահության ամրապնդման քայլերն իրականացվեն, առանց որոնց անհնար ու անիմաստ է նստել Ալիևի հետ բանակցությունների սեղանի շուրջ: Ավելին, Հոգլանդն ուղղակի արձանագրում է, որ մոտ ժամանակներս այդ ուղղությամբ որոշակի քայլեր են ակնկալում, ինչը գրեթե վերջնագրային ուղերձ կարելի է համարել ուղղված Ալիևին: Սա ոչ այլ ինչ է, եթե ոչ կոնկրետ ճնշում Ադրբեջանի ղեկավարությանը: Թամար Բագրատունի