Ցավ ապրեցի, որ չկարողացանք անգամ մեր մահացածներին տեր կանգնել. Փայլան
«Ակօսի» փոխանցմամբ, Թուրքիայի ընդդիմադիր Ժողովրդադեմոկրատական կուսակցության անդամ, Մեջլիսի հայազգի պատգամավոր Կարո Փայլանը մեկնել է Վան ու անձամբ ծանոթացել պատմական հայկական գերեզմանոցի տարածքում իրավիճակին, որտեղ վերջերս տեղի իշխանությունները հասարակական զուգարան էին կառուցել: «Այլևս որևէ կասկած չունի, որ զուգարանի կառուցման վայրում հին հայկական գերեզմանոց է եղել:Ուր ձեռքս տարա՝ մարդու ոսկոր դուրս եկավ: Ակնհայտ է, որ հասարակական զուգարանը, հանդերձարանն ու սրճարանը կառուցվել են գերեզմանների վրա: Ցավ ապրեցի, որ չկարողացանք անգամ մեր մահացածներին տեր կանգնել», - նշել է Փայլանը այցից հետո: Հայազգի պատգամավորը հավելել է, որ ծնունդով Վանից հայտնի հայ գեղանկարիչ Արշիլ Գորկու թաղամասի մոտ գտնվող աղբյուրը, որը վերակառուցվել էր 2015թ.-ին, նույնպես դադարել է գործել, իսկ Գորկու մասին հիշատակող բացատրական պաստառը հանվել է քաղաքապետարանի կողմից:
