Սեֆիլյանի գործով դատական նիստը հետաձգվեց
Շենգավիթ վարչական շրջանի ընդհանուր իրավասության դատարանում կազմակերպված խմբի կողմից ապօրինի զենք ռազմամթերք պահելու մեջ մեղադրվող Ժիրայր Սեֆիլյանի և մյուսների քրեական գործով այսօրվա դատական նիստին դահլիճում ներկա էր միայն ամբաստանյալ Հովհաննես Պետրոսյանը: Հրայր Թոփչյանի պաշտպանն ասաց, որ դատարանը պարտավոր է նիստերի դահլիճ բերել նաև մյուս ամբաստանյալներին և նրանց ևս պարզաբանել իրավունքներն ու պարտականությունները: Դատավորն ասաց, որ ամբաստանյալներին բազմիցս պարզաբանվել է դատական նիստի կարգը և այլ պարզաբանումներ ևս տրվել են: Ամբաստանյալները չեն հրավիրվի նիստերի դահլիճ,ասաց դատավորը: Մինչ այդ՝ դատավոր Տաթև Գրիգորյանը՝ հակառակ ամբաստանյալներ Ժիրայր Սեֆիլյանի և Ներսես Պողոսյանի կամքի, նրանց պաշտպանությունն իրականացնելու համար ներգրավեց հանրային պաշտպան Էմին Բեգլարյանին: Պաշտպանը միջնորդեց հետաձգել դատական նիստը, որպեսզի առանձին տեսակցի Ժիրայր Սեֆիլյանին և Ներսես Պողոսյանին, պարզի նրանց դիրքորոշումներն ու պատկերացում կազմի, թե ինչ կերպ է իրականացնելու նրանց պաշտպանությունը: Դատարանը բավարարեց միջնորդությունը և հետաձգեց դատական նիստը: Հաջորդ դատական նիստը նշանակվեց օգոստոսի 18-ին:
