Լապշաներ ու լոլոներ
«Հրապարակ օրաթերթի» գլխավոր խմբագիր Արմիե Օհանյանը թերթի խմբագրականում գրում է.
Շատ ուշագրավ ելույթ էր ունենում երկրի վարչապետը երեկ Ազգային ժողովում` հաջորդ տարվա բյուջեի նախագիծը ներկայացնելիս: Օրինակ, ասում էր, որ Հայաստանի տնտեսությունն այսօր բում է ապրում. տնտեսական ակտիվության ցուցանիշը կազմել է 14,1 տոկոս: Ոչինչ, որ տնտեսագետներն ասում են՝ տնտեսական ակտիվության ցուցանիշը դեռ տնտեսության աճ չէ, եւ այս կեղծ տերմինը կիրառվում է պարզապես շարքային քաղաքացիների վրա տպավորություն թողնելու համար:
Անգամ եթե ընդունենք, որ մեր «տնտեսությունն այսօր բում է ապրում», ապա դա ոչ մի կապ չունի այս կառավարության եւ նրա կատարած աշխատանքի հետ: Այ, Արցախի կորուստն ու պատերազմը, զոհերն ու գաղթը, Հայաստանի բուն տարածքում ծվարած թշնամին` կապ ունեն: Իսկ տնտեսական ակտիվությունը պայմանավորված է բացառապես աշխարհաքաղաքական գործոններով, ռուս-ուկրաինական պատերազմով եւ ճարահատյալ` Հայաստան տեղափոխվող զանգվածով: Նաեւ այն, որ 2018-19 թվականներին «Զվարթնոց» օդանավակայանում «բացարձակ դատարկություն» էր տիրում` օդանավեր չկային, իսկ այսօր կան, նույնպես պայմանավորված չէ Նիկոլ Փաշինյանի եւ նրա կառավարության աշխատանքով: Դա նույնպես աշխարհում տեղի ունեցող տարբեր պրոցեսների հետեւանք է:
Բարեբախտաբար, նաեւ այդ պրոցեսներն են պատճառը, որ այսօր Հայաստանը չի դատարկվել` արտագաղթի արդյունքում, որն անխուսափելիորեն կլիներ պատերազմից հետո, եթե աշխարհն այսքան անապահով չլիներ: Եվ այնպես էլ չէ, որ այդ երկնահաս տնտեսական «բումից» ՀՀ քաղաքացիներն առանձնապես շահել են. նրանց եկամուտներն անշեղորեն կրճատվում են, գները` անշեղորեն բարձրանում: Իսկ եթե ազնիվ լինեին, պետք է խոստովանեին, որ մեզանում չկա մի բնագավառ, որն այս կառավարության բուն աշխատանքի արդյունքում թեկուզ չնչին աճ արձանագրած լինի:
Հետևեք մեզ Viber-ում
