Ահա և վերջ, Վոլոդյա, կամ սպասելով` հրաշքի

ԱՄՆ-ի նախագահ Դոնալդ Թրամփը երեկ ստորագրեց Ռուսաստանի դեմ նոր պատժամիջոցներ սահմանող օրենքը: Այդպիսով Ռուսաստանի դեմ պատժամիջոցները ընդլայնող օրենքը ուժի մեջ մտավ: Ավելի վաղ օրինագիծը ստացել էր ԱՄՆ-ի կոնգրեսի երկու պալատների՝ Ներկայացուցիչների տան և Սենատի հավանությունը: Նոր օրենքի թիրախում ռուսական էներգետիկ ընկերություններն են, դրա ուժի մեջ մտնելը ի չիք է դարձնում Մոսկվայի և Վաշինգտոնի միջև հարաբերությունների մոտալուտ բարելավումը, ինչի մասին բազմիցս խոսել էր նախագահ Թրամփը իր նախընտրական քարոզարշավի ընթացքում: Նոր օրենքով նաև խիստ պատժամիջոցներ են սահմանվում Իրանի և Հյուսիսային Կորեայի նկատմամբ՝ նրանց հրթիռային ծրագրերի, ինչպես նաև մարդու իրավունքների ոտնահարումների համար: Իրանը նախօրեին բողոք է ներկայացրել ՄԱԿ-ին՝ ԱՄՆ-ին մեղադրելով 2015 թվականին կնքված միջուկային համաձայնագրի պարտավորությունները խախտելու մեջ: Կրեմլը ավելի վաղ ամերիկյան նոր պատժամիջոցները որակել էր «ծայրահեղ ագրեսիայի» օրինակ՝ մեղադրելով Վաշինգտոնին Ռուսաստանին «ապօրինի» մեկուսացնելու փորձի մեջ: Ռուսաստանի վարչապետ Դմիտրի Մեդվեդևը Ֆեյսբուքի իր էջում գրել է, որ ԱՄՆ նախագահ Դոնալդ Թրամփի կողմից հակառուսական նոր պատժամիջոցների վավերացումը «վերջ դրեց ամերիկյան նոր վարչակազմի հետ հարաբերությունները բարելավելու հույսին»: Մեդվեդևի փոխանցմամբ, «պատժամիջոցների ռեժիմը պաշտոնապես ամրագրվել է, և եթե որևէ հրաշք չպատահի, կգործի տասնամյակներ»: «Ընդ որում, այդ ռեժիմը կլինի ավելի կոշտ, քան Ջեքսոն-Վենիքի լրամշակումը, քանի որ համապարփակ բնույթ է կրում, և նախագահն առանց Կոնգրեսի արտոնության այն չի կարող փոխել», - գրել է ՌԴ-ի վարչապետը: Նա ենթադրում է, որ նոր պատժամիջոցները կհրահրեն Ռուսաստանի հետ համընդհանուր առևտրային պատերազմ, միջազգային դատարաններում և կառույցներում կսկսվեն հարաբերությունների երկարատև պարզաբանումներ, տեղի կունենա միջազգային իրավիճակի սրում և հրաժարում միջազգային կարևոր խնդիրների լուծումներից: Նոր պատժամիջոցների հանդեպ վերապահումներ դրսևորած Թրամփը հայտնել է, թե «փաթեթը վավերացրել է հանուն ազգային միասնության»: Մինչդեռ Մեդվեդևը ֆեյսբուքյան իր էջում քննադատել է ԱՄՆ նախագահին, գրելով, թե Թրամփի վարչակազմը ամենանվաստացուցիչ եղանակով գործադիր իշխանությունը հանձնել է Կոնգրեսին: «Ամերիկյան վերնախավը լիակատար հաղթանակ է տարել: Նոր պատժամիջոցները չեն ուրախացնում նախագահին, բայց նա ստիպված էր վավերացնել դրանք», - ֆեյսբուքյան իր էջում գրել է Ռուսաստանի վարչապետ Դմիտրի Մեդվեդևը: Ահա, Ռուսաստան-ԱՄՆ հարաբերությունների 8-9 ամիսների սպասումների կուլմինացիան: Չնայած իր ոչ այնքան սուր դիրքորոշմանը` ԱՄՆ նախագահը ստիպված եղավ ստորագրեց Ռուսաստանի դեմ նոր պատժամիջոցներ սահմանող օրենքը: Սա այն դեպքն է, երբ ականատես են դառնում ԱՄՆ-ում իշխանության ճյուղերի ինքնուրույնության դրսևորմանը, որտեղ նախագահի պատկերացումները ոչ միշտ կարող են համընկնել Կոնգրեսի մեծամասնության մոտեցումներին: Ռուսաստանի ղեկավարության միակն հույն էլ հենց Թրամփ նախագահի գործոնի վրա էր, ինչը փաստացի չհաշվարկված խաղ էր, փաստորեն, Մոսկվայի կողմից: Պարզ է մեկ բան` Մոսկվան կսպասի հրաշքի, իսկ այն կարող է երկար ժամանակ ուշանալ: Կամ Ռուսաստանը ներսում պետք է փոխվի, կամ նրա հետ խնդիրներն ավելի խորն ու համակարգային են դառնալու: Անորոշ փուլ է թևակոխում աշխարհը` Ռուսաստան-ԱՄՆ հարաբերությունների նոր ռեժիմում: Մետաքսյա Շալունց