Սա ուղղված է խաղաղություն կառուցելուն. Կոնգրեսական Վալադոն կարևորել է Արցախում ականազերծման աշխատանքների շարունակականությունը

ԱՄՆ Ներկայացուցիչների պալատի հանրապետական անդամ Դեյվիդ Վալադոն կարևորել  է Արցախի Հանրապետությունում ականազերծման աշխատանքների շարունակականությունը: ԱՄՆ Հայ դատի հանձնախմբից տեղեկացնում են, որ այս մասին Վալադոն ասել է հանձնախմբի ներկայացուցիչների հետ ունեցած հանդիպման ժամանակ: «Կարևորում եմ ԱՄՆ Հայ դատի հանձնախմբի հետ գործընկերությունն այս կարևորագույն նախաձեռնության շուրջ, որն ուղղված է կյանքեր փրկելուն, խաղաղություն կառուցելուն»,- ասել է կոնգրեսականը։ Նա ընդգծել, է, որ ականազերծումը տնտեսական հնարավորություններ է ստեղծում գյուղատնտեսությամբ զբաղվող ընտանիքների համար, ովքեր այժմ կարող են ականների հետ կապված սպառնալիքներից վախեր չունենալ։ «Այս  գործունեությունը երկարաժամկետ առումով պայմաններ է ստեղծում Արցախի և Ադրբեջանի միջև խաղաղ բանակցությունների համար»,- ավելացրել է Վալադոնը։ Հայ դատի հանձնախմբի ներկայացուցիչ Սևակ Թաթեոսյանը շնորհակալություն է հայտնել կոնգրեսականին այս կարևոր հարցում աջակցություն ցուցաբերելու համար: Նշենք, որ Կոնգրեսական Վալադաոն Ներկայացուցիչների պալատում ակտիվորեն ջանքեր է գործադրել, որպեսզի 2018 թվականին արտաքին օգնության օրինագծում առաջնահերթություն տրվի HALO Trust-ին տրամադրվող աջակցության ապահովմանը։ HALO Trust-ը ոչ կառավարական կազմակերպություն է, որը, 2006 թվականից ի վեր, հազարավոր պայթուցիկ սարքեր է ոչնչացրել, ինչի շնորհիվ բազմաթիվ կյանքեր են փրկվել: Այդ աշխատանքը նպաստել է տարածաշրջանային կայունությանը և տևական ու ժողովրդավարական խաղաղության հեռանկարին: