«Գրին քարտը» չի կարող տրվել պատահական և լավ է, որ այդ տեսակի «ղումարբազությունից» ԱՄՆ-ն զերծ կմնա.

«Առավոտ»-ի խմբագիր Արամ Աբրահամյանը գրել է. «ԱՄՆ նախագահ Դոնալդ Թրամփի նախաձեռնությունը՝ խստացնել «գրին քարտի», այսինքն՝ երկրում օրինական ապրելու իրավունքի տրամադրումը, ինձ թվում է տրամաբանական է, և հուսով եմ՝ կհաստատվի Կոնգրեսի կողմից: Այս հարցում Թրամփն իրավացի է՝ «գրին քարտը» չի կարող տրվել պատահականորեն, վիճակախաղով, և լավ է, որ այդ տեսակի «ղումարբազության» գայթակղությունից զերծ կմնան, մասնավորապես, մեր համաքաղաքացիները: Ես գիտեմ, որ Սիլիկոնի հովտում ապրում և աշխատում են մի քանի տասնյակ մեր քաղաքացիներ: Նրանք կրթված են,երիտասարդ, տիրապետում են անգլերենի, դրան գումարած՝ չեն հրաժարվում մեր քաղաքացիությունից, պահպանում են կապը հայրենիքի հետ, պատրաստ են Հայաստանին օգնել և օգնում են (ոչ թե փողով, այլ իրենց գիտելիքներով)… Իսկ հիմա պատկերացրեք մեկ այլ հայաստանցու՝ մոտավորապես իմ տարիքի, որը «գրին քարտ» է շահել կամ կարողացել է խաբել ամերիկյան իմիգրացիոն իշխանություններին՝ համոզելով նրանց, թե ինքը, օրինակ, միասեռական է և նրան Հայաստանում հետապնդում են: Նա ապրում է ամերիկյան կառավարության, այսինքն՝ հարկատուների տված գործազրկության նպաստով, անգլերեն չգիտի, և դա նրան պետք էլ չի: Միացյալ Նահանգների կառավարությունն իրավունք ունի՞ նմաններին իր երկիր չթողնելու: Ինձ թվում է՝ լիակատար»: Հոդվածն ամբողջությամբ՝ թերթի այսօրվա համարում: