Բա որ դպրոցի վրա սնարյադներ էին ընկնում, ինչի՞ եք երեխեքին ասել՝ ներս մտեք․ ծնողը հունից դուրս եկավ (video)

Երեւանի ընդհանուր իրավասության դատարանի Կենտրոնի նստավայրում՝ նախագահությամբ դատավոր Ջոն Հայրապետյանի, այսօր՝ սեպտեմբերի 5-ին, զորամասերից մեկի գումարտակի հրամանատար, ժամկետային եւ կրտսեր սպայական կազմի պետ Իշխան Վահանյանի գործով վկա Հայկազ Գրիգորյանը հայտնեց, որ ինքը հրաման չի տվել զինծառայողներին՝ Հադրութի դպրոցի շենք մտնելու մասին։

Զոհված զինծառայողի հարազատը հարց ուղղեց վկային՝ արդյո՞ք ինքը հոկտեմբերի 7-ին Հադրութի դպրոցում է եղել, վկան պատասխանեց, որ այդ օրը եղել է գերեզմաններում։

Հարցին՝ դպրոցը հարձակման ենթարկվե՞լ է, վկան պատասխանեց. «Դպրոցի վրա շատ է սնարյադներ ընկել»։

«Որ դպրոցի վրա շատ է ընկել սնարյադներ, ինչի՞ էիք երեխեքին ասում՝ ներս մտեք»,- վրդովված ասաց զոհվածի հարազատը։

Դատավորի ճշտող հարցին՝ զինծառայողներին տրվե՞լ է հրաման դպրոց մտնելու մասին, վկան պատասխանեց՝ ոչ։

Ըստ մեղադրանքի՝ Իշխան Արմենի Վահանյանը մեղադրվում է հանրորեն վտանգավոր այն արարքների կատարման համար, որ նա, 2020թ. հոկտեմբերի 9-ից նշանակված լինելով որպես Պաշտպանության բանակի համապատասխան զորամասի 5-րդ հրաձգային գումարտակի հրամանատար, կոչումով մայոր, ծառայողական դիրքով եւ կոչման բերումով հանդիսանալով նույն գումարտակի ժամկետային եւ կրտսեր սպայական կազմի ուղղակի պետը, 2020թ. սեպտեմբերի 27-ին ՀՀ կառավարության կողմից հայտարարված ռազմական դրության պայմաններում 2020 թվականի հոկտեմբերի 10-ին՝ ժամը 12:00-ի սահմաններում, Արցախի Հանրապետության Հադրութ քաղաքի մոտակայքում գտնվող Խուռհատ սարի վրա տեղի ունեցած մարտական գործողություններին ակտիվ մասնակցություն չունենալու եւ սեփական կյանքը չվտանգելու անձնական շահագրգռվածությունից ելնելով՝ դրսեւորել է իշխանության անգործություն՝ չի կատարել իր վրա ՀՀ ԶՈՒ ներքին ծառայության կանոնագրքով եւ ՀՀ ԶՈՒ մարտական կանոնադրությամբ դրված պարտականությունները, որն անզգուշությամբ առաջացրել է ծանր հետեւանքներ, այն է՝ Արցախի Հանրապետության պաշտպանության բանակի համապատասխան զորամասի 5-րդ հրաձգային գումարտակի մի շարք զինծառայողներ զոհվել են, անհայտ կորել, գերեվարվել, ինչպես նաեւ՝ ստացել տարբեր աստիճանի մարմնական վնասվածքներ:

Բացի այդ, Իշխան Վահանյանը, ծառայողական դիրքով եւ կոչման բերումով հանդիսանալով նույն գումարտակի ժամկետային եւ կրտսեր սպայական կազմի ուղղակի պետը, 2020 թվականի հոկտեմբերի 10-ին՝ ժամը 12:00-ի սահմաններում, Արցախի Հանրապետության Հադրութ քաղաքի մոտակայքում գտնվող Խուռհատ սարի վրա տեղի ունեցած մարտի ժամանակ ինքնակամ լքել է մարտադաշտ հանդիսացող՝ վերոնշյալ տեղանքի մարտական դիրքը: