Նենց որ՝ քիչ ծխեք. կառավարությունը հավանության արժանացրեց ծրագիրը

Այսօր կառավարության նիստում, երբ առողջապահության նախարար Լեւոն Ալթունյանը ներկայացրեց Ծխելու դեմ պայքարի ռազմավարությունը, որը սահմանում է ծխախոտի իրացման, սպառման եւ օգտագործման բազմոլորտային սահմանափակումները` օգտագործման համար արգելված վայրերի ընդլայնումը, ծխախոտի գովազդի ամբողջական արգելքը եւ այլն, հավանություն տալուց հետո վարչապետ Կարեն Կարապետյանը ասաց` «ընենց որ՝ քիչ ծխեք»: Այնուհետև, կառավարությունը հավանության արժանացրեց ծրագիրը: Ըստ ծրագրի՝ ռազմավարությամբ իրականացվող միջոցառումներն իրականացվելու է մեկ փուլով, 2017-2020 թվականների ընթացքում ակնկալվող հետևյալ արդյունքներով. 1) Ծխախոտի օգտագործման տարածվածության (տարեկան 1,5-2 %-ով) նվազեցում, 2) 15 և բարձր տարիքի տղամարդկանց շրջանում ծխախոտի օգտագործման տարածվածության ընթացիկ ցուցանիշի հարաբերական կրճատում մինչև 10%-ով: 3) Երկրորդային ծխի ազդեցության նվազեցում, որը կնպաստի արյան շրջանառության համակարգի հիվանդություններից, չարորակ նորագոյացություններից, թոքերի քրոնիկ օբստրուկտիվ հիվանդություններից և շաքարային դիաբետից ընդհանուր և վաղաժամ մահացության կրճատում 5%-ով: