Լուսանկար․ Արդարադատության նախարարության աշխատակիցը Հայաստանի քաղաքացիներին համարում է «ռսի ստրուկ»
Նիկոլ Փաշինյանի իշխանության գալով պետական համակարգ են լցվել մարդիկ, որոնք անգամ պաշտոն զբաղեցնելուց հետո շարունակում են հրապարակային ատելություն քարոզել Հայաստանի ռազմավարական դաշնակից Ռուսաստանի նկատմամբ։
Երեկ Հայաստանում Ուկրաինայի նախկին դեսպան Օլեկսանդր Բոժկոն իր ֆեյսբուքյան էջում գրել էր, թե զարմացած է, որ ֆեյսբուքի հայկական տիրույթում կան մարդիկ, ովքեր պաշտպանում են Ռուսաստանին։ Այս գրառման մեկնաբանություններում ՀՀ Արդարադատության նախարարության Պրոբացիայի ծառայության Երևանի քաղաքային մարմնի ավագ մասնագետ Տիգրան Տեր-Մարգարյանը գրել է․ «Ցավոք, բայց Հայաստանում շատ կան ռսի ստրուկներ, որոնք հանուն իրենց 2 կոպեկի պատրաստ են նույնիսկ Հայաստանի ապագան մատաղ անել հանուն պուտինի»։
Սա ակնհայտ անհարգալից վերաբերմունք է պետական համակարգում աշխատող մարդու կողմից սեփական երկրի քաղաքացիների մի հատվածի նկատմամբ։ Ու այստեղ նախարարությունը չի կարող անտարբեր մնալ, հակառակ պարագայում կստեղծի տպավորություն, որ հենց պետությունն է խրախուսում նման վարքագիծը։
Ի դեպ ժամանակին «Նյուզ․ամ» լրատվականը հետաքրքիր բացահայտումներ էր արել Տեր Մարգարյանի մասին, որը ներկայացնում ենք ստորև․
Տեր–Մարգարյանը, որը «Հանրապետություն» կուսակցության նախագահ Արամ Սարգսյանի համախոհն է, 2009-ին «Հայ Ազգային Կոնգրես»-ի կողմից առաջադրվել է որպես Երևան քաղաքի ավագանու թեկնածու, իսկ 2017թ.-ի Խորհրդարանական ընտրություններին ԵԼՔ դաշինքի կողմից առաջադրվել է որպես ԱԺ պատգամավորի թեկնածու։ Տիգրան Տեր– Մարգարյանի անունը կապվում է ԽՍՀՄ հայտնի բռնցքամարտիկ, Եվրոպայի բազմակի չեմպիոն Կամո Սարոյանի դստեր՝ Վարդուհի Սարոյանի (Տեր–Մարգարյանի կնոջ քույրը) ինքնասպանության և Սարոյանից խարդախությամբ առանձնապես խոշոր չափերի գումար հափշտակելու դեպքի առթիվ քննվող գործի հետ։
1976թ. ծնված Վ.Սարոյանը ինքնասպանություն էր գործել 2017թ. մարտի 7-ին ՝ ցած նետվելով Հրաչյա Քոչարի փողոցում գտնվող շենքերից մեկից՝ չդիմանալով իր նկատմամբ իրականացված խարդախությանն ու ունեզրկմանը։ Դեպքից մեկ ամիս առաջ ՀՀ նախագահ Սերժ Սարգսյանին (պաշտոնաթող) ուղղված նամակում Սիմոնյանը պատմել էր, որ իր ունեզրկման հետ ուղղակի առնչություն ունեն պատգամավորության նախկին թեկնածու Տիգրան Տեր-Մարգարյանը և նրա ընկերը՝ ՀՀ առաջին նախագահ Լևոն Տեր-Պետրոսյանի եղբորորդին՝ Տիգրան Տեր-Պետրոսյանը: Քրեական գործի հարուցումից մեկ տարի անց հետախուզում հայտարարվեց Տիգրան Տեր-Պետրոսյանի նկատմամբ, որին այդպես էլ չհայտնաբերեցին։ Այդ ընթացքում Տեր–Պետրոսյանի ընկերը՝ Տիգրան Տեր– Մարգարյանն ամեն ինչ անում էր, որ իր անունը չհայտնվի մամուլում և չվտանգվի իր քաղաքական կարիերան։ Արդյունքում, դեպքից երկու տարի անց քրեական գործի վարույթը կասեցվեց՝ մեղադրյալի գտնվելու վայրը հայտնի չլինելու հիմքով, իսկ գործով անցնող Տեր Մարգարյանը դարձավ Երևանի ավագանու անդամ։
Հետևեք մեզ Viber-ում
