Ալիևը չափն անցավ, արդեն ԱՄՆ-ին են «անկյուն ցույց տալիս»
ԵԱՀԿ Մինսկի խմբի «վերակենդանացման» փորձերը կարող են հանգեցնել նրան, որ ԱՄՆ-ն հեռանա հայ-ադրբեջանական հարաբերությունների կարգավորման գործընթացից, երեկ նման գնահատական է հնչեցրել պաշտոնական Բաքուն:
Ադրբեջանն իր ԱԳՆ մամուլի քարտուղար Լեյլա Աբդուլաևայի շուրթերով արձագանքել է ԱՄՆ պետքարտուղար Էնթոնի Բլինքենի կողմից դիվանագետ Ֆիլիպ Ռիկերին Կովկասում բանակցությունների գծով ավագ խորհրդական և ԵԱՀԿ Մինսկի խմբի համանախագահ նշանակելու փաստին։
Ադրբեջանի ԱԳՆ մամուլի խոսնակը նշել է, որ ԱՄՆ պետքարտուղար Էնթոնի Բլինքենի հայտարարությունը՝ Ֆիլիպ Ռիկերին Կովկասում բանակցությունների գծով ավագ խորհրդական և ԵԱՀԿ Մինսկի խմբի համանախագահ նշանակելու վերաբերյալ, «ցույց է տալիս, որ կիրառվում է տարածաշրջանում ստեղծված հետկոնֆլիկտային իրականությունից հեռու մոտեցում, ինչը զարմանք է առաջացնում»։
«ԵԱՀԿ Մինսկի խմբի մասին Ադրբեջանի դիրքորոշումը բազմիցս հնչեցվել է և հստակ ձևակերպվել բարձրագույն մակարդակում։ Գործնականում չգործող Մինսկի խմբի «վերակենդանացման» փորձերը կարող են հանգեցնել նրան, որ ԱՄՆ-ն հեռանա հայ-ադրբեջանական հարաբերությունների կարգավորման գործընթացից»,- ասել է Աբդուլաևան։
Նա կրկնել է Ադրբեջանի նախագահ Ալիևի պնդումը, թե՝ «ղարաբաղյան հակամարտությունը լուծված է»։ «Միջազգային հանրությունը, այդ թվում՝ մեր գործընկերները, պետք է հասկանան, որ հայ-ադրբեջանական հարաբերությունների կարգավորման բանակցությունները ղարաբաղյան խնդրի հետ կապելը ոչ մի կերպ չի նպաստում կարգավորմանը»,- հավելել է Ադրբեջանի ԱԳՆ խոսնակը։
Ադրբեջանի իշխանությունների սանձարձակությունն, արդեն անցնում է բոլոր թույլատրելի սահմանները: Բանը հասել է նրան, որ Ադրբեջանի իշխանությունն արդեն Վաշինգտոնին է սպառնում:
Իրականում, Ադրբեջանում հիստերիա է առաջացրել ԱՄՆ պետքարտուղար Էնթոնի Բլինկենի հայտարարությունը՝ Ֆիլիպ Ռիկերին ԵԱՀԿ Մինսկի խմբի համանախագահ նշանակելու մասին:
Դրա պատճառները բավական խորքային են. եթե Վաշինգտոնը շեշտում է ԵԱՀԿ Մինսկի խմբի գործունեության կարևորությունը ու նշանակում է նոր համանախագահ, նշանակում է՝ ԱՄՆ-ը կողմնակից է ԵԱՀԿ Մինսկի խմբի գործունեության շարունակմանը:
Իսկ եթե ԱՄՆ-ը կողմնակից է ԵԱՀԿ Մինսկի խմբի գործունեության շարունակմանը՝ նշանակում է, որ բանակցությունները շարունակվեն:
Իսկ եթե բանակցությունները շարունակվում են՝ ի՞նչ են քննարկելու միջնորդներն ու Հայաստանի ու Ադրբեջանի իշխանությունները՝ Լեռնային Ղարաբաղի կարգավիճակը:
Ահա, թե ինչն է հունից հանում Ալիևին ու ինչու են Ադրբեջանում հիստերիայի մեջ ընկել՝ ԱՄՆ-ի կողմից ԵԱՀԿ Մինսկի խմբում նոր ամերիկացի համանախագահ նշանակելու որոշումից հետո:
Մետաքսյա Շալունց
Հետևեք մեզ Viber-ում
