Թուրք ընտրողների կեսից ավելին «ոչ» է ասում Էրդողանին եւ նախագահական համակարգին. հարցում

Ստամբուլի Yöneylem սոցիալական հետազոտությունների կենտրոնի կողմից անցկացված հարցման համաձայն՝ Թուրքիայի քաղաքացիների ավելի քան 65 տոկոսը ցանկանում է վերադառնալ կառավարման խորհրդարանական համակարգին՝ ներկայիս նախագահական համակարգի փոխարեն։

Yöneylem-ի կողմից հարցվածների 60 տոկոսն ասել է, որ երբեք չի քվեարկի Ռեջեփ Թայիփ Էրդողանի օգտին 2023 թ. կայանալիք նախագահական ընտրություններում, գրում է Sözcü թերթը՝ վկայակոչելով հարցման արդյունքները։

Նրանց մասնաբաժինը, ովքեր ասում էին, որ ցանկացած պարագայում կքվեարկեն Էրդողանի օգտին, 30.7 տոկոս է կազմել։

Էրդողանը նախագահ էր վերընտրվել 2018 թ. համազգային հանրաքվեից հետո, որը ստվերվեց ձայների կեղծման մասին ընդդիմության մեղադրանքներով: 

Ինչպես ցույց է տվել հարցումը, Էրդողանի իշխող «Արդարություն եւ զարգացում» կուսակցության կողմնակիցների 79.4 տոկոսը պաշտպանում է ներկայիս նախագահական համակարգը։ Իշխող կուսակցության ծայրահեղ աջ կոալիցիոն գործընկեր «Ազգայնական շարժում» կուսակցության ընտրողների շրջանում այդ ցուցանիշը 62.9 տոկոս է կազմել: