ԱՄՆ-ՌԴ հակասությունները դժվար խնդիր են դնում հայկական դիվանագիտության առջեւ .Արման Նավասարդյան
«Խնդիրը ոչ միայն վերաբերում է երկու երկրներին, այլև ունի մեծ մասշտաբներ միջազգային հարաբերությունների և բոլոր հիմնական խաղացողների համար»,- այսօր լրագրողների հետ հանդիպման ժամանակ խոսելով ռուս-ամերիկյան հարաբերությունների մասին՝ նման տեսակետ հայտնեց Արտակարգ և լիազոր դեսպան Արման Նավասարդյանը: Հիշեցնենք, որ օրերս Միացյալ Նահանգների Սենատը հավանություն էր տվել Ռուսաստանի դեմ նոր պատժամիջոցներ սահմանող օրինագծին, որից հետո Ռուսաստանը հայտարարել է, որ ՌԴ-ում Միացյալ Նահանգների դեսպանությունը պետք է կրճատի աշխատակազմը: «Հարց է ծագում՝ ինչո՞ւ հենց հիմա դա եղավ, և ի՞նչն էր դրա պատճառը: Սա, իհարկե, պատահական և անսպասելի քայլ չէր Միացյալ Նահանգների կողմից, որովհետև դա մտնում է նրա աշխարհաքաղաքական գործողությունների հիմնական նպատակների մեջ: Եթե ավելի լայն նայենք, այն ուղղված է ոչ միայն Ռուսաստանի դեմ, այլև ունի թիրախ և՛ Հեռավոր Արևելքում, և՛ Մերձավոր Արևելքում՝ հանձին Իրանի, և՛ եվրասիական մասշտաբներով: Որոշ փորձագետներ ասում են, որ սա ժամանակավոր խնդիր է, որ արագ կկարգավորվի, և ամեն ինչ կընկնի իր հունի մեջ: Ես, ելնելով ամերիկյան իրողությունից և այն խնդիրներից, որ այսօր դրված է ԱՄՆ-ի առաջ, այն կարծիքի եմ, որ սա տևելու է տասնյակ տարիներ»,- նշեց Ա. Նավասարդյանը: Արման Նավասարդյանի խոսքերով՝ երկու գերտերությունների՝ Ռուսաստանի եւ ԱՄՆ-ի հարաբերությունները բացասաբար կանդրադառնան նաև Հայաստանի վրա: «Կնեղանա եւ կփոքրանա Հայաստանի դիվանագիտության մանեւրելու հնարավորությունը ԱՄՆ-ի եւ Ռուսաստանի միջեւ: Կարծում եմ, որ Ռուսաստանը պետք է կարծրացնի իր դիրքորոշումն անգամ իր դաշնակիցների նկատմամբ: Լավ բան դրանից չեմ սպասում: Ինչ վերաբերում է տնտեսական խնդիրներին, այստեղ էլ երկու կարծիք կա՝ ասում են, որ դա կարող է բացասաբար անդրադառնալ: Ռուսաստանի դժվարությունները կանդրադառնան հայկական տրանսֆերտների վրա, մյուս կողմից ասում են, որ սա կարող է դրական ազդեցություն ունենալ, բայց եթե մեծ տերություններն առճակատվում են, երբեք եւ երբեք փոքր պետությունները չեն շահում: Նույնիսկ Թուրքիա եւ Ռուսաստան հարաբերությունները, որ շատ-շատերը ասում են ինչքան վատ եղավ հարաբերությունները, մեզ համար լավ է, ես հակառակ կարծիքի եմ»,- եզրափակեց Արման Նավասարդյանը:
Հետևեք մեզ Viber-ում
