ՀՅԴ անդամ հոլանդահայ աղջկան թույլ չեն տվել ՀՀ մտնել. անցանկալի անձանց ցանկն ընդլայնվում է (video)

Այս գիշեր Հայաստան ժամանած ՀՅԴ Նիդեռլանդների երիտասարդական միության անդամ Սյունե Աբրահամյանին թույլ չեն տվել մուտք գործել երկիր։ Տեղեկությունը հայտնում է ՀՅԴ բյուրոյի երիտասարդական գրասենյակը։

«Վերջինիս հետ ուղարկելու որոշումը կայացվել է առանց որևէ հիմնավոր բացատրություն կամ պատճառաբանություն ներկայացնելու»,- ասված է հաղորդագրության մեջ։

Նշվում է, որ Հայաստանի իշխանությունը «թիրախավորել է նվիրյալ և ազգասեր սփյուռքահայ երիտասարդությանը»։

«Նրանց մուտքը հայրենիք արգելվում է և զուգահեռ իրականության մեջ թույլատրվում է թուրք ազգայնականների մուտքը Հայաստանի Հանրապետություն, ինչին ականատես եղանք վերջին շաբաթների ընթացքում»,- ասված է հաղորդագրության մեջ։

ՀՅԴ-ն դիմում է ՀՀ ազգային անվտանգության ծառայությանը՝ կոչ անելով իրականացնել սահմանված գործառույթները, «չտրվել ապօրինի քաղաքական հրահանգներին և գործել կանոնակարգին, առաքելությանը համապատասխան՝ պաշտպանելով Հայաստանի և Արցախի հանրապետությունների ազգային անվտանգությունը»։

Հավելենք, որ Սյունե Աբրահամյանը կատարվածի մասին գրառում է արել և տեսանյութ տեղադրել ֆեյսբուքյան իր էջում։

«Ինձ 12 ժամ առանց որևէ բացատրության պահելուց հետո, տեղեկացրեցին, որ հայրենիք մուտք չեմ կարող գործել` անցանկալի անձ եմ և պետք է վերադառնամ Նիդեռլանդներ»,- գրել է Սյունեն։

Երկուշաբթի օրվանից Սյունիքում մեկնարկում է ՀՅԴ Երիտասարդական միության կազմակերպած կամավորական ճամբարը, որին նաև ինքը պետք է մասնակցեր։