ԿԳՄՍ կոշտ հայտարարությունը կապվա՞ծ է Փաշինյանի հրաժարականի վերաբերյալ Ծառուկյանի դիրքորոշման հետ (video)
Կառավարության նիստին հնչեցվել է, որ Հիսուսի արձանի տեղադրման գաղափարը կա, կան փաստաթղթավորման հետ կապված խնդիրներ, սակայն տեղակայման դիրքի մասին որեւէ բան չի նշվում: Այս մասին այսօր՝ հուլիսի 11-ին, լրագրողների հետ զրույցում ասաց ԿԳՄՍ նախարար Վահրամ Դումանյանը՝ մեկնաբանելով, թե ինչու է նախարարությունն իր տարածած հայտարարության մեջ հեռացրել այն հատվածը որտեղ նշված էր «Հատիս լեռան՝ որպես տեղադիրքի ընտրության վայր տեղեկատվությունը ստացվել է լրատվամիջոցներից»:
«Եկեք փնտրեք այնտեղ, որտեղ կորցրել ենք, այլ ոչ թե այնտեղ, որտեղ լույս կա: Դուք ֆիքսվել եք մի դրվագի վրա, որը կարեւոր չէ: Այն հայտարարությունը, որը տեղադրված է այսօր, նույնն է: Նախորդ օրը, եթե դուք ինչ-որ բան եք նկատել, տեխնիկական խնդիր է եղել: Այն ինֆորմացիան, որն ուղղակի ծանրաբեռնել է հայտարարությունը, դուրս է բերվել: Կառավարության նիստին նշվել է, որ մեր դիրքորոշումը դրական է եւ հետագա գործընթացը պետք է լինի գործող կարգին համապատասխան: Ի՞նչ եք կարծում՝ կառավարությունը լրատվամիջոց է: Մեզ հայտնի է, որ գաղափարը Հիսուսի արձանը Հատիսի վրա տեղադրելն է, որ օրը եղավ հաստատված նախագիծը, այդ պահից էլ կարող ենք ասել, որ տեղադրվում է»,- նշեց Դումանյանը:
Վահրամ Դումանյանի խոսքով՝ ցանկացած քաղաքաշինական հարցով, եթե կա մտահոգություն, ԿԳՄՍ-ն պահանջում է խստորեն հետեւել օրենսդրության պահանջներին:
«Մենք հստակ հայտարարություն ենք տարածել եւ նշել կարգը; Հուսով ենք՝ հետագան կլինի կարգին համաձայն: Ինչ կլինի՝ կապրենք կտեսնենք: Մեր մարմնի հետ Հատիսի մասին չի եղել քննարկում: Իսկ, ես, որպես քաղաքացի, ոչ հիմքեր ունեմ ասելու, որ եթե այն լինի, մենք մեզ ավելի լավ կզգանք, ոչ էլ հիմքեր ունեմ ասելու, որ անթույլատրելի է, վատ է»,- ընդգծեց նախարարը:
Հարցին, թե հնարավոր է, որ ԿԳՄՍ-ն հայտարարությունը տեղադրել է արձանի տեղադրման աշխատանքների մեկնարկի հաջորդ օրն այն պատճառով, որ Գագիկ Ծառուկյանը լրագրողների հետ զրույցում ասել է, որ իր՝ Նիկոլ Փաշինյանի հրաժարականի պահանջը չի փոխվել, Դումանյանը պնդեց, որ դրանք իրար հետ աղերս չունեն:
«Դրանք իրար հետ բացարձակ կապ չունեն: Նման կապ փնտրել պետք չէ: Այս հայտարարությունը որեւէ քաղաքական պատճառ չունի»,- ասաց Քերոբյանը:
Հիշեցնենք, որ ԿԳՄՍ նախարարությունը խմբագրել է իր հաղորդագրությունը, որը վերաբերում է Հատիս լեռան տարածքում Հիսուս Քրիստոսի արձանի տեղադրմանը: Մասնավորապես, հանվել է հետեւյալ մասը. «Հատիս լեռան՝ որպես տեղադիրքի ընտրության վայր տեղեկատվությունը ստացվել է լրատվամիջոցներից»:
Մինչդեռ հուլիսի 7-ին կայացած կառավարության նիստի ժամանակ հենց վարչապետ Նիկոլ Փաշինյանն է հայտարարել, որ «Մուլտի գրուպ» կոնցեռնի ղեկավարը հանդես է եկել նախաձեռնությամբ՝ Հատիս սարի վրա Հիուս Քրիստոսի արձանի կառուցման վերաբերյալ: Համապատասխան փաստաթղթերը ներկայացվել են կառավարություն»:
Ստացվում է, որ ԿԳՄՍ նախարարությունը չի լսել վարչապետի խոսքը, դրա մասին տեղեկացել է մամուլից:
Հետևեք մեզ Viber-ում
