Արթուր Դավթյանը կհեռանա՝ առանց Նիկոլ Փաշինյանի լուսանկարի՞

Նախորդ շաբաթ Հայաստանն ունեցավ առաջին կին գլխավոր դատախազը։ Իշխող «Քաղաքացիական պայմանագիրը» ՀՀ գլխավոր դատախազի պաշտոնում առաջադրեց Աննա Վարդապետյանի թեկնածությունը՝ Արթուր Դավթյանի փոխարեն։ Մինչ այդ Աննա Վարդապետյանը վարչապետ Նիկոլ Փաշինյանի օգնականն էր։
36-ամյա Աննա Վարդապետյանը իրավաբանական գիտությունների թեկնածու է, երբևէ դատախազությունում չի աշխատել, համակարգը, ինչպես ընդունված է ասել, ներսից չգիտի։ Սակայն իշխանությունը՝ Նիկոլ Փաշինյանի գլխավորությամբ համոզված է, որ նրա մասնագիտական կարողությունները բավարար են ՀՀ գլխավոր դատախազի պաշտոնում աշխատելու համար և, որ նա լավագույն թեկնածուն է:

Մինչ վարչապետի օգնական աշխատելը նա զբաղեցրել է արդարադատության նախարարի տեղակալի պաշտոնը,: Ասում են՝ Արթուր Դավթյանին փոխարինելու որոշումը կայացրել է ընդամենը 24 ժամում:

Ազգային ժողովն արդեն կատարել է գլխավոր դատախազի ընտրությունը։ Արթուր Դավթյանի լիազորությունները դադարում են սեպտեմբերի 16-ին, որից  հետո Աննա Վարդապետյանը կդառնա անկախ Հայաստանի պատմության մեջ առաջին կին գլխավոր դատախազը: Հաջողություն մաղթելով նրան այդ պատասխանատու գործում՝ նկատենք՝ Աննա Վարդապետյանն Արթուր Դավթյանից մեղմ ասած լավ ժառանգություն չի ստացել։Աննա Վարդապետյանի գործունեությանն անդրադառնալու առիթներ դեռ կլինեն։ Իսկ ահա Արթուր Դավթյանի գործունեությունը իրապես հիշարժան է։
Լինելով նախկին իշխանությունների կարկառուն կադրերից մեկը՝ Արթուր Դավթյանը 2018 թվականի իշխանափոխությունից հետո շատ արագ հարմարվեց նոր իրավիճակին և լծվեց Փաշինյանի իշխանության պատվերով գործեր սարքելու նվիրական գործին։
Արթուր Դավթյանը գլխավոր դատախազի պաշտոնը ստացավ 2016 թվականին՝ փոխարինելով Գևորգ Կոստանյանին։ Ուշագրավ մի դրվագ կա՝ կապված Արթուր Դավթյանի պաշտոտնի ստանձման հետ։
Երբ 2016 թվականի սեպտեմբերի 13-ի ԱԺ նիստում, Արթուր Դավթյանը իբրև դատախազի թեկնածու պատասխանում էր պատգամավորների հարցերին, այն ժամանակ դեռ ընդդիմադիր պատգամավոր Նիկոլ Փաշինյանը գլխավոր դատախազի թեկնածուից փորձեց ճշտել՝ ինչո՞ւ Հատուկ քննչական ծառայության քննիչների գլխավերևում կախված է նախագահ Սերժ Սարգսյանի լուսանկարը, և արդյոք պաշտոնը ստանձնելուց հետո Դավթյանը նո՞ւյնպես հետևելու է այդ օրինակին: «Եվ ի դեպ, ես չեմ եղել Գևորգ Կոստանյանի աշխատած շրջանում նրա աշխատասենյակում, հիմա կախվա՞ծ է էդ նկարը», - հարցրել էր Փաշինյանը:
Պատասխանը դրական էր. - «Պարոն Փաշինյան, այո, Հայաստանի Հանրապետության գլխավոր դատախազի աշխատասենյակում փակցված է հանրապետության նախագահի նկարը, և ենթաօրենսդրական ակտերի ուսումնասիրությունը, կարծում եմ, Ձեզ Ձեր էդ հարցի համապատասխան պատասխանը կտա»:
Հոտո արդեն ստացվեց այնպես, որ Արթուր Դավթյանը գլխավերևում սկսեց կախել Նիկոլ Փաշինյանի լուսանկարը։ Ոչ Փաշինյանը, ոչ էլ Դավթյանը այդ փաստից դիսկոմֆորտ չէին ապրում։ Սա, ի միջի այլոց։
Իբրև Գլխավոր դատախազ՝ Արթուր Դավթյանը բավական թույլ և անկարող էր։ Բավական է նշել ընդամենը մեկ փաստ․ գլխավոր դատախազությունը այդպես էլ չկարողացավ բացահայտել, թե ո՞վ էր գաղտնալսել ԱԱԾ նախկին տնօրեն Արթուր Վանեցյանի, ՀՔԾ նախկին պետ Սասուն Խաչատրյանի ու վարչապետ Նիկոլ Փաշինյանի խոսակցությունը։
Փոխարենը՝ Դավթյանը իրեն դրսևերոց որպես լիակատար կամակատար, ինչը նկատելի դրսևորում ստացավ հատկապես Մարտի 1-ի գործով, երբ նա Փաշինյանի անմիջական ցուցումով կալանքի միջնորոդություն ներկայացրեց երկրորդ նախագահ Ռոբերտ Քոչարյանի նկատմամբ։ Վերը հիշատակված ձայնագրության մեջ այդ մասին վկայող հստակ փաստեր կան։
Արթուր Դավթյանի կամակատարությունը ի ցույց դրվեց նաև աղմկահարույց և առեղծվածային սպանությունների գործերով։
Գլխավոր դատախազությունը սպառիչ և համոզիչ նախանքննություն չիրականցրեց ԱԱծ նախկին տնօրեն Գեորգի Կուտոյանի, նախկին ոստիկանապետ Հայկ Հարությունյանի սպանության գործերով։ Երկու դեպքում էլ նախկին բարձրաստիճան պաշտոնյաների սպանությունները որակվեցին ինքնասպանություններ, այն դեպքում երբ նրանք համարվում էին կարևոր տեղեկատվության կրողներ՝ Հարությունյանը՝  Մարտի 1-ի , Կուրտոյանը՝ 2018-ի իշխանափոխության գործերով։

Ինչևէ, հեռանալիս Արթուր Դավթյանն իր հետ կարող է տանել Նիկոլ Փաշինյանի խոշոր լուսանկարը․ դա հաջողության թալիսմանի պես մի բան է, կարող է օգտակար լինել նաև հետագայում։

Հայկ Դավթյան