Սամվել Կարապետյանն ասել է՝ ինչու է հանդիպել Նիկոլ Փաշինյանի հետ
Օրերս Երևանում էր գտնվում «Տաշիր» ընկերությունների խմբի նախագահ, «Հայաստանի ներդրողների ակումբի» հիմնադիր Սամվել Կարապետյանը:
Կառավարության կայքում հրապարակվեց, որ նա պաշտոնական հանդիպում է ունեցել վարչապետ Նիկոլ Փաշինյանի հետ: Հանդիպմանը զրուցակիցներն անդրադարձել են տնտեսության ոլորտում ՀՀ կառավարության ծրագրերին, գործարար միջավայրի բարելավմանն ուղղված քայլերին ու բարեփոխումներին: Այդ համատեքստում քննարկվել են «Տաշիր» ընկերությունների խմբի կողմից իրականացվող ներդրումային ծրագրերի ընթացքն ու ապագայում նախատեսվող նախագծերը։
Հիշեցնենք, որ նախորդ տարի Հայաստանում գործարարների մեծ ֆորում եղավ, որին մասնակցում էր նաև Սամվել Կարապետյանը, հայտարարվեց, որ պատրաստվում են տնտեսական մեծ հեղափոխություն իրականացնել, որը, սակայն փուչիկի էֆեկտ ունեցավ, որովհետև մենք տեսնում ենք, որ տնտեսական ինչ խայտառակ իրավիճակ է, ինչ ներդրումներ են կատարվում Հայաստանում:
Ինչևէ, անդրադառնալով այս հանդիպմանը, ասենք, որ Սամվել Կարապետյանի այստեղ գտնվելու հիմնական պատճառը Սամվել Ալեքսանյանի դստեր հարսանիքին մասնակցելու հանգամանքն էր, որին ներկա էին նաև այլ գործարարներ թե Հայաստանից, թե դրսից:
Հարցին, թե ինչու է Սավմել Կարապետյանը մասնակցել Փաշինյանի հետ հանդիպմանը, քանի որ այն շատ վատ ընկալվեց հանրության կողմից, հատկապես այն ֆոնին, որ նա շարունակում է երկիրը կործանել և ավիրել, ծիծաղելով պատասխանել է, որ հարսանիք էր եկել, ձեռքի հետ էլ հանդիպել է Նիկոլին:
Փաստորեն, Փաշինյանը դարձել է ձեռքի հետ հանդիպելու անձնավորություն:
Հետևեք մեզ Viber-ում
