Եկավ, բանակցեց, ստացավ համաձայնություն, սլանում է Բաքու
Ռուսաստանի Դաշնության արտաքին գերատեսչության ղեկավար Սերգեյ Լավրովը հաջորդ շաբաթվա ընթացքում երկօրյա այցով կմեկնի Բաքու: Այդ մասին ճեպազրույցում հայտնել է ՌԴ արտգործնախարարության մամլո խոսնակը: «Հունիսի 23-24-ը արտաքին գործերի նախարար Սերգեյ Լավրովն աշխատանքային այց է կատարելու Ադրբեջան: Այնտեղ ծրագրված են բանակցություններ արտգործնախարար Ջեյհուն Բայրամովի հետ, ենթադրվում է, որ տեղի կունենա հանդիպում նախագահ Իլհամ Ալիևի հետ», - ասել է Մարիա Զախարովան:
Անցյալ շաբաթ Ռուսաստանի արտգործնախարարը պաշտոնական երկօրյա այցով Երևանում էր, որտեղ ՀՀ իշխանությունների հետ, նա ՀՀ ԱԳ նախարար Արարատ Միրզոյանի հետ բանակցություններից հետո մամլո ասուլիսում որոշակի ուշագրավ մտքեր արտահայտեց՝ տրանսպորտային ապաշրջափակման «պարզեցված» եղանակների մասին:
Այնուհետև նրա այցից մի քանի օր անց տեղեկատվություն տարածվեց, որ ռուս սահմանապահները ՀՀ տարածքում որոշակի դերակատարություն են ունենալու Հայաստան-Ադրբեջան ճանապարհների վրա, և ահա այս տեղեկությունների արտահոսքի ֆոնին, փաստորեն, Լավրովը շտապում է Բաքու:
Նա Ալիևին ու իր ադրբեջանցի գործընկերոջն, ըստ ամենայնի կտեղեկացնի հայաստանյան բանակցությունների արդյունքների մասին, թե ինչին են համաձայնություն տվել իշխանությունները:
Ու մինչ Հայաստանի ընդդիմությունն ազատեց Ֆրանսիայի հրապարակը ու մինչ Լավրովը Բաքու կհասնի՝ Ադրբեջանի նախագահ Իլհամ Ալիևն ուղերձ է հղել Շուշիում ընթացող «Թուրք-ադրբեջանական ռազմավարական միություն. Խաղաղության և անվտանգության աղբյուր Կովկասի և տարածաշրջանի համար» խորագրով կոնֆերանսի մասնակիցներին, որը նվիրված է Շուշիի հռչակագրի ստորագրման մեկամյակին:
«Հռչակագիրը հիմնված է ոչ միայն ընդհանուր պատմական անցյալի վրա, այլ արտացոլում է այսօրվա իրողությունները, ինչպես նաև սահմանում է Ադրբեջանի և Թուրքիայի հետագա գործակցության ռազմավարական ուղղությունները: Շուշիի հռչակագրում արտացոլված պարտավորությունների իրականացումը կնպաստի մեր երկրների միջև բազմակողմ գործակցության հետագա ընդլայնմանը, ինչպես նաև ներդրում կունենա տարածաշրջանային ինտեգրացիոն գործընթացների և անվտանգության վրա: Այս փաստաթուղթը կօգնի Ադրբեջանի և Թուրքիայի հզորության ամրապնդմանը, միջազգային թատերաբեմում մեր երկրների դիրքերի ամրապնդմանը»,- ասվում է ուղերձում:
Դրանում նաև նշվում է, որ երկու երկրների միությունը հիմնված է ընդհանուր քաղաքական կամքի և ապագայի նպատակներին հասնելու համար համատեղ գործողությունների վրա: Նրա խոսքով, թուրք-ադրբեջանական միությունը կարևոր է ոչ միայն երկու երկրների, այլև ողջ թյուրքական աշխարհի համար:
«Կցանկանայի գոհունակությամբ նշել , որ ամուր համերաշխությունը երկու երկրների միջև կարևոր է նաև թյուրքական աշխարհում հարաբերությունների զարգացման համար: Դա հիմքեր և հնարավորություններ կստեղծի թյուրքական պետությունների՝ ազգային-ռազմավարական նպատակներին հասնելու համար՝ նոր աշխարհակարգի պայմաններում պատասխանելով ժամանակի մարտահրավերներին, ինչպես նաև բացում է նոր հեռանկարներ թյուրքալեզու երկրների համար»,- ասվում է ուղերձում:
Մետաքսյա Շալունց
Հետևեք մեզ Viber-ում
