Քաղաքացուն թույլ չեն տվել հանդիպել Փաշինյանի հետ և բերման են ենթարկել հարազատների հետ միասին
Քիչ առաջ hayeli.am-ին ահազանգեց Արարատի բնակչուհի Գայանե Հովհանյանը և տեղեկացրեց, որ իրեն, իր նշանածին և մայրիկին ոստիկաններն առանց պատճառաբանության բերման են ենթարկել:
Ինչպես Գայանեն պատմեց՝ Արարատ քաղաքի հրապարակից ոստիկանները բերման են ենթարկել իրեն, նրա մորը եւ նշանածին: Նա ասաց, որ Արարատ քաղաքի հրապարակում կանգնած սպասում էին աշխատանքային այցով քաղաքում գտնվող Նիկոլ Փաշինյանին, եւ, ոստիկանները մոտեցել են իրենց եւ բիրտ ուժ կիրառելով բերման են ենթարկել, քանի որ ճանաչում են իրեն, և գիտեն իր ընդդիմադիր հայացքների մասին: Գայանեն մեզ հետ զրույցում վստահեցրեց, որ իրենք մի քանի հարց ունեին վարչապետին, սակայն մի քանի ոստիկան, իրենց հրմշտելով, տարել են Վեդիի ոստիկանություն:
«Ոստիկանությունում սկզբում արձանագրություն անգամ չէին կազմում, չէին ասում, թե ինչի են բերման ենթարկել: Մենք անընդհատ հարցնում էինք մեզ բերման ենթարկելու պատճառը, սակայն, այդպես էլ մեզ ոչինչ չասացին»,- պատմեց Գայանեն եւ հավելեց, որ մեկ ժամ իրենց պահելուց հետո նոր միայն արձանագրություն են կազմել, ստորագրել տվել, որից հետո ազատ են արձակել:
Հետևեք մեզ Viber-ում
