Բողոքի ակցիա Կառավարության շենքի դիմաց․ ի՞նչ են պահանջում «Հաղթանակ» թաղամասի բնակիչները (video)

Նախկինում հողերի այգեգործական կարգավիճակը փոխելու համար 1 քառակուսի մետրը արժեր 2500 դրամ, հիմա պետք է վճարենք 10 500։ Այս մասին այսօր՝ հունիսի 2–ին, Կառավարության շենքի դիմաց անցկացվող բողոքի ակցիայի ժամանակ ասաց հողային իրավաբան Սամվել Գաբրիելյանը։

«Մենք երկար ժամանակ Կառավարությունում հանդիպումներ ենք ունեցել, սակայն հարցին լուծում չի տրվել։ Մեր վրդովմունքը հայտնելու համար այսօր այստեղ ենք եկել։ Ինչի՞ հիման վրա են կատարվել այդ թանկացումները՝ առանց հանրությանը տեղյակ պահելու։ Նախկինում հողերի այգեգործական կարգավիճակը փոխելու համար 1 քառակուսի մետրը արժեր 2500 դրամ, հիմա պետք է վճարենք 10 500։ Նախկինում քաղաքի մեջ եղել են ադմինիստրատիվ տարածքներ, որոնք ունեցել են այգեգործական նպատակով հողեր։ 2010 թվականին վարչապետի հրամանագրով այդ կարգավիճակը փոխվել ու դարձել է բնակելի կառուցապատման։ Մեր բողոքն այն է, որ առանց հանրությանը տեղյակ պահելու, իրենք փոփոխություններ են կատարել»,– ասաց Սամվել Գաբրիելյանը եւ հավելեց, որ տեղի ունեցած փոփոխությունները ներքին կարգով տրված հրահանգի արդյունք են։

Բողոքի ակցիայի մասնակիցը մտավ Կառավարության ընդունարան, որպեսզի հանդիպում պահանջի Կառավարության ներկայացուցիչների հետ։

Մեկ այլ բնակիչն էլ պատմեց, որ հորից ժառանգած տունը 1990–ականների սկզբին սեփականաշնորհվել է, սակայն որեւէ կերպ նա չի կարողանում տնօրինել այդ տունը։

«Իրենք նշում են, որ գյուղնշանակության հող է, բայց մենք չենք օգտվում գյուղվարկերից, սուբսիդավորումից։ Մենք չենք հասկանում էդ սեփականության ակտը վավե՞ր է, թե՝ ոչ։ Ոչ մի գործարք անել չենք կարողանում, նույնիսկ վերջին երկու տարիների ընթացքում մեզնից հարկ չէին վերցնում»,– ասաց «Հաղթանակ» թաղամասի բնակիչը։