Թուրքերն արդեն «դռներ են ծեծում»՝ Փաշինյանի իշխանությանն օգնելու համար
Պարզվում է, Թուրքիան և Ադրբեջանը՝ «խաղաղություն և բարի կամք» են դրսևորում՝ հանուն տարածաշրջանում կայունության ապահովման, բայց ավաղ նրանք տեսնում են, որ Հայաստանի ներսում արմատականները, իսկ դրսից՝ սփյուռքը ճնշում են գործադրում Հայաստանի իշխանությունների վրա...
Սա Թուրքիայի իշխանության ներկայացուցչի կողմից արված մի հայտարարություն է, որը ի ցույց է դնում, թե իրականում, որ Անկարային ու Բաքվին որքան է հարկավոր, որպեսզի Նիկոլ Փաշինյանը անհապաղ խաղաղության համաձայնագիր ստորագրի Ադրբեջանի հետ:
Երևանը պետք է դրական արձագանքի Բաքվի «խաղաղարար նախաձեռնություններին» (չակերտները՝ Tert.am), այս մասին հայտարարել է Թուրքիայի արտգործնախարար Մևլութ Չավուշօղլուն՝ Նյու Յորքում ՄԱԿ-ի կենտրոնակայանում պատասխանելով ադրբեջանցի լրագրողների հարցերին, հաղորդում է թուրքական «Անադոլու» գործակալությունը։
«Մենք շարունակում ենք կոչ անել և խրախուսել Հայաստանին արձագանքել այս բարի մտադրություններին։ Մենք տեսնում ենք, որ երկրի ներսում արմատականները, իսկ դրսից՝ սփյուռքը ճնշում են գործադրում Հայաստանի իշխանությունների վրա։ Մենք արդեն ասել ենք ոչ միայն (ԱՄՆ պետքարտուղար Էնթոնի) Բլինկենին, այլև մեր մյուս զրուցակիցներին, որ Հայաստանին պետք է ավելի շատ խրախուսել այս ուղղությամբ։ Երեկ (ԱՄՆ պետքարտուղարի հետ) մեր հանդիպման ժամանակ մենք ևս մեկ անգամ հիշեցրինք, որ Թուրքիան և Ադրբեջանը խաղաղություն են ցանկանում և բարի կամք են դրսևորում՝ հանուն տարածաշրջանում կայունության ապահովման», - ասել է Չավուշօղլուն։
Չավուշօղլուն հիշեցրել է, որ ադրբեջանական կողմը Հայաստանին առաջարկել է կնքել համապարփակ խաղաղ համաձայնագիր։ Այնուհետև նա հավելել է, որ Ադրբեջանը նույնպես աջակցում է Թուրքիայի և Հայաստանի միջև հարաբերությունների կարգավորման բանակցություններին։
Այսինքն, եթե հանրագումարի բերենք Թուրքիայի արտգործնախարարի հայտարարության բովանդակությունը, ապա իրավիճակը հետևյալն է՝ Փաշինյանն իր «թավշյա» իշխանությամբ, Բաքուն ու Անկարան Հայաստանում ընդդիմության ակտիվությունը համարում են ընդդեմ խաղաղությանը սպառնացող վտանգ:
Ավելին՝ Մևլութ Չավուշօղլուն Նյու Յորքում ՄԱԿ-ի կենտրոնակայանում ամերիկացի գործընկերներին, փաստորեն, խորհուրդ է տվել Հայաստանի իշխանություններին էլ ավելի մեծ ուժով աջակցել: Ու ԱՄՆ-ում, փաստորեն, լավ էլ սերտել են ՆԱՏՕ-ական իրենց գործընկերոջ բարեկամական խորհուրդը: ՀՀ-ում ԱՄՆ դեսպանն անմիջապես անցավ գործի՝ աջակցություն հայտնելով Հայաստանի իշխանություններին:
Հայաստանում պայքարի դուրս եկած քաղաքական ուժերը պետք է գիտակցեն, թե որքան կարևոր պայքար է գնում Հայաստանի ապագայի համար այս օրերին: Նրանք պետք է հաշվարկեն այս բարդ խաղի բոլոր կողմերը, որպեսզի ունենան գործընկերներ, այլ ոչ թե ավելացնեն հակառակորդներ:
Մետաքսյա Շալունց
Հետևեք մեզ Viber-ում
