«Դիլիջան ազգային պարկը» տանում են կործանման

Դիլիջան ազգային պարկում վերջին աղմկոտ ծառահատումների բացահայտումից հետո բնապահպանության նախարարությունը անտառապահպանության նոր մեթոդ է որոշել ներդնել: Մինչ այժմ Դիլիջանի անտառները պահպանում էին անտառապահները, որոնք թիվը 50-60 էր, նրանցից յուրաքանչյուրը մի որոշակի տարածք էր հսկում եւ համարվում տվյալ տարածքի պատասխանատում: Սակայն հիմա որոշել են 24-ժամյա պահպանությունը փորձնական ծրագրով փոխանցել մասնավոր պահնորդական կազմակերպությանը, որը պետք է ապահովի շարժական եւ հենակետային պահնորդական խմբեր, գործելու են 9-10 պահնորդներ, կամ այսպես կոչված անտառային շրջիկ ոստիկանները, 24 ժամյա հսկողություն: Մասնագետները սա համարում են կործանարար, քանի որ այլեւս չի լինելու անհատական պատասխանատվության հարց, շրջիկ պահնորդներից ամեն մեկը կարող է խույս տալ պատասխանատվությունից՝ ասելով, որ ինքն այդ պահին այլ տարածք է հսկել: