Ծեծկռտուք, հրաժարական․ ՔՊ-ում այնքան էլ խաղաղ չէ
Օրեր առաջ մամուլում տեղեկություն հրապարակվեց, որ Գյումրու ավագանու «Քաղաքացիական պայմանագիր» խմբակցության անդամ, Շիրակի մարզպետ Նազելի Բաղդասարյանի եղբայրը՝ Արման Բաղդասարյանը, ֆեյսբուքյան իր էջում գրառում էր կատարել՝ տեղեկացնելով, որ դուրս է գալիս «Քաղաքացիական պայմանագրից», վայր է դնում ավագանու իր մանդատը։
Նա հրապարակել է «Քաղաքացիական պայմանագիր» կուսակցության վարչության նախագահ Սուրեն Պապիկյանին ու Գյումրու համայնքապետ Վարդգես Սամսոնյանին հղված իր դիմումները։
Ավելի ուշ Արման Բաղդասարյանը ևս մեկ գրառում է կատարել՝ ներկայացնելով դիմումների պատճառը:
Ըստ իս, մենք ձախողում ենք քաղաքի կառավարումը, ուստի ես ընդունում եմ մեղքի իմ բաժինը և կրում պատասխանատվություն իմ մասով։ Համապատասխան դիմումը ներկայացրել եմ վարչության նախագահի անունով։ Թե ինչ կորոշի վարչությունը, հավելյալ կտեղեկացնեմ։
Անկախ զարգացումներից՝ ինքս մնացել եմ հեղափոխության գաղափարների ու արժեքների կրողը»,- գրել է Բաղդասարյանը։
Արման Բաղդասարյանի կինը՝ Անի Քոչարյանը, ով Գյումրու համայնքապետարանի աշխատակազմի ծրագրերի և արտաքին կապերի բաժնի պետի ժ/պ–ն էր, ֆեյսբուքյան իր էջում ևս գրառում է կատարել՝ հայտնելով, որ ապրիլի 15-ից սեփական դիմումի համաձայն այլևս չի զբաղեցնելու այդ պաշտոնը։
hayeli.am-ի ունեցած տեղեկություններով՝ մանդատը վայր դնելու պատճառը եղել է այն, որ վերջինիս և Գյումրում փոխքաղաքապետ Արթուր Պապիկյանի միջև, ով «Քաղաքացիական պայմանագիր» կուսակցության վարչության նախագահ Սուրեն Պապիկյանի հորեղբոր որդին է, տեղի է ունեցել ծեծկռտուք։ Ծեծկռտուքին էլ հաջորդել է այն, որ Նազելի Բաղդասարյանի եղբայրը՝ Արման Բաղդասարյանը որոշել է վայր դնել ավագանու մանդատը, դուրս գալ ՔՊ-ից՝ իր հետ տանելով նաև կնոջը։
Հետևեք մեզ Viber-ում
