«Դիլիջան ազգային պարկի» ջարդի պատասխանատուներից մեկը «թռած» է

Դեռ ընտրություններից առաջ, փետրվարին, բնության հատուկ պահպանվող տարածք հանդիսացող «Դիլիջան ազգային պարկ» ՊՈԱԿ-ում ստուգումներ էին սկսվել լայնածավալ ծառահատումների վերաբերյալ։ Ապրիլի 20-ին հայտնի դարձավ, որ Տավուշի դատախազությունում քրեական գործ է հարուցվել «Հաղարծին» տեղամասում առանձնապես խոշոր չափի ապօրինի ծառահատում կատարելու առթիվ:Երկու հոգի ձերբակալվել են: Հիմքը մամուլի հրապարակումներն էին եւ Սերժ Սարգսյանի ու վարչապետ Կարեն Կարապետյանի խիստ հանձնարարականները։ Դատախազությունը տվյալներ ուներ, որ Հաղարծինում ապօրինի հատվել է 100 ծառ եւ «պետությանը պատճառվել է առանձնապես խոշոր չափի՝ 18 միլիոն 906 հազար 474 դրամ վնաս»: Ստուգումները շարունակվեցին եւ ահա, երեկ բնապահպանության նախարարությունը ամփոփեց, որ ստուգումներ են իրականացվել «Դիլիջան ազգային պարկի» տարածքի մոտ 60 տոկոս տարածքներում, հայտնաբերվել է ապօրինի հատված ավելի քան 6 հազար 300 ծառ: Ապօրինի հատված 1820 ծառի վերաբերյալ ազգային պարկը ժամանակին կազմել է վարչական ակտեր եւ կամ ներկայացրել իրավապահ մարմիններին»։ Իհարկե. Այս ցուցանիշը մի քանի տարիների պատկրն է արտացոլում, որովհետեւ 2014 թվականից է նախարարությունն ստուգումներ իրականացնում Դիլիջանի անտառներում, սակայն վերջին 1-2 տարվա կտրվածքով լավատեղյակ աղբյուրի պնդմամբ մոտ 1500-2000 ծառ է հատվել: Դեռեւս ամիսներ առաջ հրապարակումներ եղան, որ լայնամասշտաբ ծառահատումներ իրականացվել են ընտրությունների ամիսներ առաջ, երբ պարկի արդեն նախկին տնօրեն Սահակ Մուրադյանը արձակուրդում էր, նա երեք ամիս արձակուրդ էր վերցրել եւ զբաղվում էր պատգամավորության թեկնածու հոր՝ Մուրադ Մուրադյանի նախընտրական քարոզչությամբ: Ըստ հրապարակումների՝ այդ շրջանում պարկում պատասխանատու էր Մուրադյանի տեղակալ Վաղինակ Վասիլյանը, նրա հովանավորչությանն էին վերագրում լայնամասշտաբ ծառահատումները:Վասիլյանը տեղակալի պաշտոնում նշանակվել է անցած տարվա նոյեմբերից եւ պաշտոնավարել է մինչեւ մայիս, մեր տեղեկություններով  թռել է եւ հիմա գտնվում է ԱՄՆ-ում: