Անահիտ Ավանեսյանն, իրականում, վաղուց ՔՊ-ի անդամ է, բայց թաքցնում է

«Հրապարակ օրաթերթը» գրում է․ 

 Մենք այսօր գրել էինք, որ առողջապահության նախարար Անահիտ Ավանեսյանը դեռ չի անդամակցել «Քաղաքացիական պայմանագիր» կուսակցությանը, բայց այնպես չէ, որ դեմ է անդամակցությանը։ «Երբևէ կուսակցական չեմ եղել, բայց, իհարկե, մշտապես դիտարկում եմ լինելու, հարելու որևէ կուսակցության, և երբ որ որոշումս կայացնեմ, կդիմեմ այդ կուսակցությանն անդամագրվելու, որը նշում եք»,- մեզ հետ զրույցում ասել էր Ավանեսյանը՝ չնելով, սակայն, թե երբ է անդամակցել ՔՊ-ին։

Այս լուրից հետո մեզ տեղեկացրին, որ Անահիտ Ավանեսյանն, իրականում, վաղուց ՔՊ-ի անդամ է, և 2021 թ․ հունիսի 20-ի խորհրդարանական ընտրույթւոններին էլ հենց որպես ՔՊ-ական է մասնակցել, որում համոզվելու համար ընդամենը պետք է մտնել ԿԸՀ կայքն ու բացել ՔՊ-ի նախընտրական ցուցակը, որտեղ ինչպես Նիկոլ Փաշինյանի, Արարատ Միրզոյանի, Սուրեն Պապիկյանի և այլ ՔՊ-ականների, այնպես էլ Անահիտ Ավանեսյանի անվան դիմաց կուսակցական պատկանելությունը նշված է՝ «Քաղաքացիական պայմանագիր»։ Իսկ, ահա, նրանք, որոնք կուսակցական չեն, օրինակ՝ Խաչատուր Սուքիասյանը, Գագիկ Մելքոնյանը, նրանց անվան դիմաց նշված է՝ անկուսակցական։

Մենք փորձեցինք կապ հաստատել Ավանեսյանի հետ՝ հասկանալու համար, թե ո՞րն էր ստելու պատճառը, եթե ինքը վաղուց ՔՊ-ական է, բայց մեզ ասում է՝ դեռ պետք է որոշում կայացնի, որ անդամակցի ՔՊ-ին, սակայն Ավանեսյանը չպատասխանեց մեր զանգերին։