Արայիկ կոչեցյալ, պաշտոնական հանդիպմանդ ո՞ւր էր Արցախի դրոշը
Էն որ մարդիկ խոսում, ասում են՝ Նիկոլը ծրագրված է եկել, որ Արցախը հանձնի, շատերը մտածելու տեղ՝ հակաճառում են։ Զարմանում եմ, որ որոշ մարդիկ քոռացել ու ոչինչ չեն տեսնում։ Ականջներին գոռում ես՝ չեն լսում, աչքներն ես խոթում՝ չեն տեսնում։ Որոշներն էլ այնքան անտարբեր են, որ նրանց թմբիրից հնարավոր չէ հանել։
Ես մի օրինակ կբերեմ միայն, որ Նիկոլ Փաշինյանը ի սկզբանե Արցախը որպես ինքնուրույն միավոր չի ճանաչել ու դա չի քողարկել, մնացած օրինակների շուրջ դուք մտածեք։
2019 թվականի հոկտեմբեր ամսին Նիկոլ Փաշինյանը Երևանում` կառավարությունում, ընդունել էր Բակո Սահակյանին և պաշտոնական հանդիպմանը տեղադրված էր միայն ՀՀ դրոշը, որը քննարկումների առիթ դարձավ, բայց և լռեցվեց՝ իբր մոռանալու պատճառով է եղել։ Այն ժամանակ եթե Փաշինյանն ասեր՝ ի՞նչ Արցախ, ես Արցախ չեմ ճանաչում, մարդիկ խելքի կգային։ Բայց ցանկացած իրադրության մեջ ամենաանհեթեթ պատճառին մարդիկ հավատացել են, չեն իմացել գլխներին գալիքը։ Մտածել են՝ դե մեր Նիկոլն ա էլի, մոռացել է, կամ էլ նրա բերած մանկապարտեզը «խամ է, դեռ բան չի հասկանում»։
2020թ մայիսի 28-ին Կառավարությունում տեղի է ունեցել Հայաստանի Հանրապետության վարչապետ Նիկոլ Փաշինյանի և Արցախի Հանրապետության նախագահ Արայիկ Հարությունյանի պաշտոնական առաջին հանդիպումը։ Մինչ այդ Հայաստանի Առաջին Հանրապետության օրվա առթիվ նրանք հարգանքի տուրք են մատուցել Սարդարապատի հերոսների հիշատակին։ Առաջին պաշտոնական հանդիպումն էր Արցախի Հանրապետության նորընտիր նախագահի հետ։ Ու դա պիտի լիներ արժանապատիվ հանդիպում՝ հարգվեր Արցախի Հանրապետության դրոշը։ Հանդիպման ժամանակ չկար Արցախի դրոշը։
Արցախը որպես անկախ պետություն ունի իր պետական խորհրդանիշերը՝ ազգային, դրոշ, զինանշան, օրհներգ։ Արցախի նախագահն առանց Արցախի դրոշի ինչի՞ էր նման․․․ Գրեցին, ղժժացին, էլի ասացին, որ մոռացել են։
Վարչապետ ընտրվելու առաջին տարվա մայիսի 9-ին Ստեփանակերտում Արցախը բանակցային սեղանի շուրջ վերադարձնելու խոստում տվող Նիկոլ Փաշինյանը ինչպե՞ս կարող էր Արցախի նորընտիր նախագահի հետ պաշտոնական հանդիպմանը «մոռանար հանձնարարել տեղադրելու» Արցախի Հանրապետության դրոշը։ Այդ ընթացքում էր, որ Արցախի նախագահ ասելու փոխարեն Փաշինյանը հայտարարեց «Արցախի ներկայացուցիչ»։
Սրանք հարցեր են, որոնց հետո շատ եք անդրադառնալու, ցավոք, ուշ է լինելու։ Հիմա Արցախի նախագահը Արցախով մտահո՞գ է դարձել, ինքնորոշման իրավու՞նք է ուզում։ Մնում է ասել՝ Արայիկ կոչեցյալ, պաշտոնական հանդիպմանդ ու՞ր էր Արցախի դրոշդ։
Ինչու՞ ձայն չէիր հանում։
Հասմիկ Բաբաջանյան
«Հրապարակ օրաթերթ»
Հետևեք մեզ Viber-ում
