Փորձում են կոտրել փաստաբանության ողնաշարը. Հայկ Ալումյան

«Գործընկերություն հանուն բաց հասարակության» նախաձեռնությունն այսօր կազմակերպել էր «Համակարգային անպատժելիությունը՝ որպես մարտահրավեր քրեական արդարադատությանը» խորագրով հանրային քննարկմանը Փաստաբան, «Բաց հասարակության» հիմնադրամի անդամ Հայկ Ալումյանը նշեց՝ երբ քրեական կամ վարչական արդարադատության մասին է խոսքը, ապա անձը հաճախ   ստիպված է միայնակ մարտնչել պետության դեմ: «Չարագուշակություն չանեմ, բայց այն մարդիկ, ովքեր պետության անունից մարդկանց մեղադրում են դատարաններում ցանկացած պահի կարող են իրենք հայտնվեն մեղադրյալի  կարգավիճակում և մեղադրեն նույն պետության կողմից»,-ասաց նա: Հայկ Ալումյանը նշեց, որ փաստաբանի անհրաժեշտությունը կարող է զգալ ցանկացած մեկը, և պետությունը անձի դեմ և անձը պետության դեմ պայքարում փաստաբանը պետք  է լինի պետության ոտնձգություններից զերծ, ունենան անկախության անհրաժեշտ երաշխիքները, որպեսզի պետությունը չկարողանա փաստաբանին «խեղդել» և պաշտպանյալին պաշտպանելու փոխարեն իրեն պաշտպանի: «Վերջին զարգացումները ցույց են տալիս, որ պետությունը կենտրոնացել է փաստաբանների նկատմամբ համատարած ճնշումներին, ստեղծում է իրավիճակներ, որտեղ նախապես կարելի է գուշակել, թե իրենց ինչպես պահեն»,- ասաց նա: Անդրադառնալով ՊՊԾ գունդը գրաված անձանց ծեծի ենթարկելուն՝ փաստաբանն ասաց, որ  բռնությունը  տեղի է ունեցել ուժի ոչ օրինական և անհամաչափ կիրառմամբ: «Ամբաստանյալներին պարզապես բիրտ ու վիրավորական քարշ տալով հանվել են դատարանից, իջեցվել են նկուղում գտնվող խցեր և այդ հատվածում ենթարկվել են դաժան  ծեծի և նրանց ձեռքերը ձեռնաշղթաներով շղթայված են եղել: Դուք պատկերացնո՞ւմ եք փաստաբանի աչքի առաջ իր պաշտպանյալին ենթարկում են ծեծի, սա նշանակում է, որ փաստաբանին մասնագիտական առումով վիրավորում են, և արհամարհում են փաստաբանական գործունեությունը»,-ասաց նա: