Բարդ օպերացիա. Էրդողանը` Պուտին-Փաշինյան-Ալիև փաստաթղթով, հայկական կողմին «հարձակվող» է համարում

Եռակողմ հայտարարության հիման վրա կարևոր է ապահովել Հայաստանի զինված տարրերի ամբողջական դուրսբերումը Ադրբեջանի՝ միջազգայնորեն ճանաչված տարածքներից․ սա արդեն Թուրքիայի նախագահի գնահատականն է:

Իսկ սա մի երկրի ղեկավար է, որը Հայաստանի հետ հարաբերությունների կարգավորման գործընթաց է նախաձեռնել, ու թեև դեռևս ոչ մի առաջընթաց չկա Հայաստան-Թուրքիա հարաբերություններում, Էրդողանն արդեն պահանջներ է ներկայացնում հայկական կողմին: Թուրքիայի նախագահ Թայիփ Էրդողանը Լեռնային Ղարաբաղի տարածքում Ադրբեջանի գործողությունները «պաշտպանական պատասխան» է անվանել: «Ադրբեջանն ամբողջությամբ կատարում է Ռուսաստանի, Հայաստանի և Ադրբեջանի միջև եռակողմ համաձայնագրի դրույթները։ Ուստի Ադրբեջանի կողմից որևէ խախտում չկա։ Քանի որ հարձակում է եղել Ադրբեջանի վրա, եղել է նաև պաշտպանական պատասխան»,- Ուզբեկստանից վերադառնալուց հետո թուրք լրագրողներին ասել է Էրդողանը:

Ուշադրություն դարձրեք Էրդողանի այս հայտարարությանը՝ «քանի որ հարձակում է եղել Ադրբեջանի վրա»... Այսինքն, Էրդողանը համարում է՝ ո՞վ է հարձակվել Ադրբեջանի վրա... Ռուս խաղաղապահնե՞րը, Արցախի պաշտպանության բանա՞կը, թե՞ Հայաստանը, որը Լեռնային Ղարաբաղում զորք չունի...

Ասել կուզի՝ Լեռնային Ղարաբաղում ցանկացած տեղում Ադրբեջանն իրավունք ունի տեղաշարժվել և բնակչության ընդվզումը համարվում է հարձակում Ադրբեջանի վրա:

Ու այս ամենը դեռ Հայաստան-Ադրբեջան չստորագրված պայմանագրի պայմաններում:

Ուշադրություն դարձնենք նաև այն հանգամանքին, որ Էրդողանը հղում է կատարում Հայաստանի, Ադրբեջանի ու Ռուսաստանի միջև ստորագրված եռակողմ հայտարարությանը, այսինքն, հասկացնում է, որ 2020թ. նոյեմբերի 9-ի փաստաթղթով Լեռնային Ղարաբաղը Ադրբեջանինն է և Բաքուն ազատ է ինչ ուզենա՝ այնտեղ անի:
Էրդողանից առաջ երեկ խոսել է նաև Ալիևը:

Ադրբեջանի նախագահ Իլհամ Ալիևը հույս է հայտնել, որ ապրիլի 6-ին ՀՀ վարչապետ Նիկոլ Փաշինյանի հետ հանդիպումն արդյունավետ կլինի։

«ԵԽ-ն հայտարարեց, որ կառույցի նախագահ Շառլ Միշելի նախաձեռնությամբ իմ նոր հանդիպումը կկայանա Հայաստանի վարչապետի հետ։ Հուսով եմ, որ այդ հանդիպումն արդյունավետ կլինի։ Արդեն մի քանի հանդիպում կայացել է, և մենք պետք է գնանք Ադրբեջանի և Հայաստանի միջև խաղաղության պայմանագրի կնքմանը, որքան հնարավոր է կարժ ժամկետում ստորագրենք այդ փաստաթուղթը։ Ադրբեջանն արդեն ներկայացրել է իր սկզբունքները՝ ելնելով իր տեսլականից», - ասել է Ալիևը։

Այս հայտարարությունը Ադրբեջանի նախագահը հնչեցրել է Բաքվում՝ ԵԱՀԿ գործող նախագահ, Լեհաստանի ԱԳ նախարար Զբիգնև Ռաուի հետ հանդիպման ժամանակ։
Ահա, այսպիսի բարդ իրավիճակ: Թուրքիան արդեն Հայաստանին է պահանջներ ներկայացնում, Ադրբեջանն էլ՝ շտապեցնում է Փաշինյանին, թե՝ «արի խաղաղության համաձայնագիր ստորագրի»:

Մետաքսյա Շալունց