Ինչու են լարվել նախարարի և ռեկտորի հարաբերությունները

Հրապարակը գրում է․ Մենք երեկ գրել էինք, որ մարտի 19-ին ԵՊՀ գիտական խորհրդի անդամներին էլփոստի միջոցով տեղյակ էին պահել, որ մարտի 24-ին, ժամը 14։00-ին, ԵՊՀ գիտական խորհրդի նիստերի դահլիճում տեղի է ունենալու հանդիպում ՀՀ նորընտիր նախագահ Վահագն Խաչատուրյանի հետ։ Բայց երեկ, առավոտյան ժամը 10-ին գիտխորհրդի անդամներին, կրկին էլփոստով, նամակներ են ուղարկվել, որ ՀՀ նախագահի հետ այդ օրվա հանդիպումը չի կայանալու: Համալսարանում շրջանառվող լուրերի համաձայն, ՀՀ նախագահի ԵՊՀ այցը վերջին պահին կասեցվել է Նիկոլ Փաշինյանի կողմից։ Դրա համար միջնորդել-խնդրել է ԿԳՄՍ նախարար Վահրամ Դումանյանը:

Բանն այն է, որ նրա եւ ԵՊՀ ռեկտոր Հովհաննես Հովհաննիսյանի հարաբերությունները շուրջ երեք ամիս է՝ լարված են, եւ Դումանյանը սրանով ցանկանում է ԵՊՀ ռեկտորին հասկացնել, որ ԵՊՀ-ում տեղի ունեցող գործընթացներն իր սրտով չեն, եւ ինքը կարող է այնպես անել, որ ռեկտորը չկարողանա խաղաղ պաշտոնավարել։ Կկարողանա այնպես անել, որ Հովհաննիսյանի հանդեպ վերաբերմունքը փոխեն նաեւ ՀՀ կառավարությունն ու անձամբ Նիկոլ Փաշինյանը:

Զրուցեցինք գիտխորհրդի անդամ, արեւելագիտության ֆակուլտետի դեկան Ռուբեն Մելքոնյանի հետ, ով հաստատեց մեր լուրը եւ ասաց, որ իսկապես՝ էլեկտրոնային փոստով իրենց տեղեկացրել են, թե հանդիպումը հետաձգվել է, սակայն պատճառների մասին տեղյակ չեն։

Այս թեմայով մանրամասներ ճշտելու նպատակով դիմեցինք ԵՊՀ հայոց լեզվի ամբիոնի վարիչ, ԵՊՀ գիտական խորհրդի անդամ Յուրի Ավետիսյանին: Նա էլ հաստատեց մեր լուրերը, թե հաղորդագրություն են ստացել, որ նորընտիր նախագահ Վահագն Խաչատուրյանի հետ հանդիպումը տեղի չի ունենալու:

- Իսկ պատճառը նշված չի՞ եղել:

- Պատճառը նշված չի եղել, չգիտեմ:

- Տեղյակ չե՞ք, թե նախագահի հետ հանդիպմանն ինչ պետք է քննարկվեր:

- Ոչ, չգիտեմ, ոչինչ չկար նշված, զանգահարեք ռեկտորատ: Ես էլ՝ Ձեզ նման: Մեզ ոչ մի օրակարգ չեն ուղարկել, չգիտեմ, թե հանդիպմանն ինչ էր քննարկվելու: Գիտխորհրդի անդամներին տեղեկացրին, որ նիստ է լինելու, հետո էլ ասացին, որ նիստը չի կայանա:

- Չհետաքրքրվեցի՞ք, թե նորընտիր նախագահի հետ ինչ հարցեր պետք է քննարկվեն:

- Չէ, չեմ հետաքրքրվել:

- Պարոն Ավետիսյան, ասում են՝ ռեկտորն ու ԿԳՄՍ նախարար Վահրամ Դումանյանը հակասություններ ունեն, նախարարն առհասարակ գալի՞ս է ԵՊՀ:

- Այո, որոշ ժամանակ առաջ եկել էր, բայց էդ հարցն ինչի՞ եք ուղղում: Զանգահարեք այլ անդամների: