Արեգնազ Մանուկյանի ելույթը վրդովվեցրեց Ռուբեն Ռուբինյանին (video)

Սա առաջին դեպքը չէ, երբ պետբյուջեի հաշվին իշխող խմբակցության պատգամավորները դառնում են թանկարժեք զբոսաշրջիկներ: Այս մասին, այսօր՝ մարտի 22-ին, ԱԺ-ում հայտարարեց «Հայաստան» խմբակցության պատգամավոր Արեգնազ Մանուկյանը՝ անդրադառնալով ԱԺ նախագահ Ալեն Սիմոնյանի գլխավորած պատվիրակության Ինդոնեզիա այցին:

Նիստը վարող ԱԺ փոխխոսնակ Ռուբեն Ռուբինյանը կոչ արեց չշեղվել թեմայից, խոսել օրակարգի մասին:

«Իսկ Կնյազ Հասանովը օրակարգի՞ց էր խոսում»,-հարցրեց Արեգնազ Մանույնաը, ինչին Ռուբինյանը պատասխանեց, որ Կնյազ Հասանովի համար հասկանալի պատճառով բացառություն արվեց: Նշենք, որ Հասանովը խոսել էր քրդական խնդիրների մասին:

Արեգնազ Մանուկյանն, այդուհանդերձ շարունակեց իր ելույթը. «Նրանք այդ այցերը ներկայացնում են որպես դարակազմիկ, բայց այդ այցերից Հայաստանին զրո, կամ զրոյից շատ տարբերվող օգուտ կա: Տպավորությունն այնպիսին է, որ այս մարդկանց համար ԱԺ-ն վերածվել է տուրիստական գործակալության: Ռոտացիոն սկզբունքով արտասահման են մեկնում, մի լավ ման գալիս ու վերադառնում կառավարությունից իջեցված հերթական հրահանգը կատարելու: Շրջագայությունները մեծամասնության պատգամավորների համար յուրօրինակ բոնուս են՝ հնազանդորեն ենթարկվելու դիմաց: Մեկն ինձ կարո՞ղ է բացատրել, թե ինչ են անելու 8 օր 11 հոգով Բալիում եւ Նուսադուայում: Այդ ի՞նչ ճակատագրական հարցեր են լուծելու, գերիների հա՞րցն են լուծելու, սրնթփաց աճող գների դե՞մն են առնելու, Արցախի հումանիտար աղե՞տն են կանխելու, թե՞ Ադրբեջանից դուրս Արցախի հարցն են կարգավորելու:

Թե որքան գումար է վատնվել այս այցի ճանապարհածախսի, օրապահիկի, գիշերավարձի վրա, դեռ կպարզենք: Սա իսկական երեսպաշտություն է եւ ցինիզմ: Նախկինում քննադատել բյուջեի մսխումը, հետո գալ իշխանության եւ բյուջեի մսխման առումով գերազանցել բոլոր նախորդ իշխանություններին: Ժողովրդավարության բաստիոն հռչակված ու ժողովրդավարության բարձրագույն լիգայում իբր հանդես եկող ուժի դեպքում հենց այդպես էլ պետք է լիներ: Սա է այս մարդկանց իրական դեմքը»,-հայտարարեց Մանուկյանը:

ԱԺ փոխխոսնակ Ռուբեն Ռուբինյանն արձառանքեց. «Տիկին Մանուկյան, ես ձեզ կոչ եմ անում լինել կոռեկտ, մնալ օրակարգի շրջանակներում եւ ԱԺ նիստերի դահլիճը չխառնել ու չշփոթել 7or.am-ի հետ»:

Նշենք, որ Արեգնազ Մանուկյանը երկար տարիներ աշխատել է 7or.am կայքում որպես լրագրող: