Պատասխանե՞լ եք Բաքվին, դե հանրայնացրեք՝ ի՞նչ եք պատասխանել․ Արթուր Վանեցյանը՝ Փաշինյանին (video)
Հայաստանն ու Արցախն այսօր կանգնած են անվտանգային լրջագույն մարտահրավերների առաջ. պատերազմից հետո Ադրբեջանը խաղաղության համար նոր պահանջներ է առաջ քաշում, այսօր Ազգային ժողովում հայտարարեց «Պատիվ ունեմ» խմբակցության ղեկավար Արթուր Վանեցյանը։
Վանեցյանի համոզմամբ՝ Ադրբեջանի առաջարկած հինգ սկզբունքները Արցախից հրաժարվելու, Արցախի հարցը վերջնական փակելու մասին է։
«Բաքվի կողմից իրականացվող հարկադրանքի քաղաքականությանը սահուն կերպով միացել ու աջակցում է Թուրքիան, ինչի ամենաթարմ վկայությունը ՀՀ արտաքին գործերի նախարարի այցն էր Անթալիա ու այդ այցին հաջորդած Թուրքիայի բարձրաստիճան պաշտոնյաների հայտարարություններն առ այն, որ Հայաստանը պետք է ընդունի Ադրբեջանի առաջարկները», - հայտարարեց Վանեցյանը։
Նա ընդգծեց, թե այս ամենին ի պատասխան՝ Երևանը լուռ է, ավելի ճիշտ, խոսում է, շարունակում է խոսել «խաղաղության դարաշրջան» բացելու մասին։
«Պատիվ ունեմ» խմբակցության ղեկավարի խոսքով՝ զավեշտալի է Հայաստանի այսօրվա իշխանության դիրքորոշումը Ադրբեջանի կողմից ներկայացված հինգ կետի վերաբերյալ։
«Այստեղ տրամաբանական հարց է առաջանում՝ պատասխանե՞լ եք այդ հինգ պահանջին, թե՞ ոչ, եթե պատասխանել եք, ի՞նչ տրամաբանությամբ եք հրաժարվում հանրայնացնել այն , ո՞րն է նպատակը։ ՀՀ իշխանությունները պատրաստակամություն են հայտնում Ադրբեջանի հետ խաղաղության համաձայնագրի վերաբերյալ բանակցությունները կազմակերպելու համար դիմել ԵԱՀԿ Մինսկի խմբի համանախագահներին. չգիտեն արդյոք, որ ԵԱՀԿ Մինսկի խումբը չունի նման մանդատ, չեն հասկանում արդյոք, որ այսկերպ Արցախը գործընթացից դուրս թողնելով՝ անդառնալի սխալ են գործում, թե՞ հերթական անգամ ադրեջանական օրակարգն են սպասարկում», - հայտարարեց Արթուր Վանեցյանը։
Հետևեք մեզ Viber-ում
