Не первый день замужем. Քաղաքապետ (video)

«Իմ ականջին տարբեր բաներ են գալիս, հասնում, որ ես զբաղված եմ, փաստաթղթեր չեմ ստորագրում՝ սկսած շինթույլտվություններից և ավարտական ակտից. նորից բացահայտ ես ասում եմ՝ այդ ամեն ինչը սուտ է: Ավարտական ակտերը նույնիսկ ես եմ ասում, թե ինչ՞ւ չեք բերել, ես եմ հիշեցնում: Էն որ ասում են, թե քաղաքապետը զբաղված է ու ավարտական ակտ չի ստորագրում, սուտ է, ձեզ խաբում են։ Խնդրում եմ, այդ դեպքերում զանգեք թեժ գիծ ու անուն-ազգանուն տվեք, թե ով է իմ անունը շահարկել։ Ինչ վերաբերում է շինթույլտվություններին, ապա շաբաթը երեք օր ես փոստ եմ նայում՝ երեքշաբթի, չորեքշաբթի եւ ուրբաթ օրերին: Միգուցե, այո, ծանրաբեռնված է, խնդիրներ կան, բայց պետք չի շենքերի տակ խոսել, թե քաղաքապետը զբաղված է։ Ի՞նչ է նշանակում քաղաքապետը զբաղված է։ Իմ գործն է, ես պետք է անեմ, դա էլ է գործ: Ինձ մոտ փոստ չի մնում: Եթե խնդիր կա, քաղաքացուն ասեք՝ հարգելիս, խնդիր ունենք, կներեք, 5 օր հետո կամ 10 օր հետո կպատասխանենք»,- Երեւանի քաղաքապետարանի գործակարգավարական խորհրդակցության ժամանակ հայտարարեց Երեւանի քաղաքապետ Հրաչյա Սարգսյանը։

«Իսկ եթե ասում են՝ քաղաքապետը զբաղված է, ավարտական ակտերը չի ստորագրում, ես այդտեղ արդեն ուրիշ միտում եմ տեսնում: Մի՛ արեք ընենց, որ սկսեմ զբաղվել արդեն անուններով, տեսնեմ, թե ով ա ասել։ Եթե ձեր մոտ խնդիր կա ավարտական ակտերի հետ կապված, եկեք, ասեք՝ խնդիր կա, հասկանանք՝ ինչումն է խնդիրը: Եթե ես առավոտյան փոստը չնայեմ, դուք ժամը 9-ից ոչ մի բանով չեք զբաղվելու: Եթե ժամը 12-ին, 1-ին փոստը նայեի, այդ ժամից էիք սկսելու գործ անել, ժամը 6-ը գալու էր, 5 րոպե պակաս թողնելու էիք, գնալու էիք, գործերն էլ էդպես մնալու էր:

Գիտեմ՝ ինչ եմ ասում էլի, ասում ա՝ «Не первый день замужем»։ Հորդորում եմ՝ ձեր աշխատակիցներին իմ անունից, երբ ինչ-որ բան են ասում, շատ զգույշ լինեն։ Փոքր քաղաք ա էլի, էդ ամեն ինչը 5 րոպեում գալիս, հասնում ա: Ու տարբեր տեղերից է գալիս, բայց ենթադրում եմ, որ ինիցիատորները մի քանի հոգի են», - ասաց Հրաչյա Սարգսյանը։