Վահագն Խաչատուրյանի ծանր երդումը․ գինը շատ թանկ է լինելու

Վահագն Խաչատուրյանի երդման արարողությունը ըստ սահմանադրության պետական արարողակարգ է։ Սակայն ըստ բովանդակության՝ այդ միջոցառումը խրախճանք էր ժանտախտի պահին։
Խնդիրը երդմնակալությունը չեղարկումը չէր, պարզ է, որ եթե Վահագն Խաչատուրյանը համաձայնվել էր դառնալ Նիկոլ Փաշինյանի թիմի դրածո նախագահը, ապա երդումն անխուսափելի էր։
Իսկ ի՞նչն է նախագահելու Հայաստանի 5-րդ նախագահը, որին ՔՊ-ականները հպարտությամբ հռչակել են լեգիտիմ նախագահ տիտղոսով։ Վերջին չորս տարվա ընթացքում մենք ականատես եղանք լեգիտիմ դավաճանության, լեգիտիմ հայրենավաճառության, գենոֆոնդի լեգիտիմ սպառման։ Նույն լեգիտիմությամբ հանձնվեց Արցախի 80 տոկոսը։ Հիմա լեգիտիմության այս շարքն հասել է վերջնական կործանման հերթական փուլին։ Նիկոլականների համար ամենակարևորը լեգիտիմությունն է, ոչ թե կործանման փաստը։ Վահագն Խաչատուրյանի նախագահական ինագուրացիան իր ողջ հմայքով այնքան անբովանդակ էր, այնքան հեռու պետության ներկա մարտահրավերների իրական ընկալումներից, որ նույնիսկ հեթական բառով բնորոշելն այս միջոցառման համար չափազանցված գնահատական կլինի։
<<Ադրբեջանցիները կրակում են՝ հետո՞ ինչ, միևնույն է՝ գնալու ենք խաղաղության>>։ Սա բառացի մեջբերում է ՔՊ-ի նորընտիր նախագահ Վահագն Խաչատուրյանի հայտարարությունից։ Իսկ ՔՊ-ի առաջնորդ Նիկոլ Փաշինյանը հայտարարել է, որ այո, կա միջադեպ Արցախում, բայց մենք չենք մեկնաբանում։
Արցախում հումանիտար ճգնաժամ է՝ անջատված է գազը, էլեկտրականությունը, Ադրբեջանական զինուժն անընդհատ կրակում է Արցախի բնակավայրերի՝ Խրամորթ, Կարմիր Շուկա և այլ գյուղերի վրա, թիրախավորում են մարդկանց, տները, դպրոցներ: Ընդ որում, կրակում են ինչպես փոքր, այնպես էլ խոշոր տրամաչափի զինատեսակներով ։
Արցախի գյուղերի անմիջական հարևանությամբ Ադրբեջանը ցուցադրաբար կուտակում է ծանր ռազմական տեխնիկա, այդ թվում` տանկեր: Ադրբեջանական զինուժը բարձրախոսներով ահաբեկում է խաղաղ բնակչությանը, սպառնում է, որ որ լքեն իրենց հայրենի բնակավայրերը:Ընդ որում սպառնում է հայերենով։
Ահա այսպիսի պայմաններում Վահագն Խաչատուրյանը երդվում է․ «Ստանձնելով Հանրապետության նախագահի պաշտոնը՝ երդվում եմ. հավատարիմ լինել Հայաստանի Հանրապետության Սահմանադրությանը, իմ լիազորություններն իրականացնելիս լինել անաչառ, առաջնորդվել միայն համապետական ու համազգային շահերով և իմ ողջ ուժը ներդնել ազգային միասնության ամրապնդման գործում»:
Վահագն Խաչատուրյանն ինքն էլ չի հավատում իր երդմանը։ Վստահաբար նա համողզված է, որ սուտ երդում է տվել, որովհետև հասկանում է՝ չի կարելի խաղաղության գնալ, երբ քո վրա կրակում են։
Սուտ երդում է տվել, հետո էլ գնացել Եռաբլուր, որովհետև այդպես է կամեցել Փաշինյանը։
Հայաստանի հինգերորոդ նախագահ Վահագն Խաչատուրյանի երդման արարողությանը Հայաստանի նախկին նախագահներից որևէ մեկը չի մասնակցել։ Ներկա չի եղել նաև խորհրդարանական ընդդիմությունը։ Ներկա չէին նաև Արցախի նախկին նախագահները․ ներկա էր միայն Արցախի գործող նախագահ Արայիկ Հարությունյանը։ Սա աննախադեպ խայտառակ ինագուրացիա էր Հայաստանի անկախության 30 տարիների ընթացքում։
Բոլորը, այդ թվում նաև ինքը՝ Վահագն Խաչատուրյանը համոզված են, որ նոր նախագահի հիմնական ֆունկցիան լինելու է Նիկոլ Փաշինյանի դավաճանության և հայրենավաճառության վավերացումը, որի ավարտին մենք կարող ենք կորցնել ոչ միայն Արցախից մնացած հատվածը, այլ միգուցե նաև Հայաստանի որոշ մասը։
Իսկապես ծանր, շատ ծանր երդում էր։

Հայկ Դավթյան