Եթե չեն ուզում բյուջե փող մտնի, թող ասեն՝ մենք ձեր թշնամին ենք. ավտոներկրողների բողոքի ակցիան (video)

Ավտոներկրողները Պետեկամուտների կոմիտեի շենքի դիմաց բողոքի ակցիա են իրականացնում. Նրանք պահանջում են չբարձրացնել ավտոմեքենաների մաքսազերծման գումարները:

«Ավտովարորդների պաշտպանության լիգայի» նախագահ Տիգրան Հովհաննիսյանը նշեց, որ պետությունը որոշել է երկուշաբթի օրվանից կրկնակի բարձրացնել մաքսազերծման արժեքները եւ հսկիչ գները: Նա ներկայացրեց այսօր գործող արժեքները, ըստ որի, օրինակ 2015-ի արտադրության «Շեվրոլե Մալիբու» մեքենայի մաքսազերծման արժեքը կազմում է 2050 դոլար, հսկիչ գինը՝ 3500 դոլար, 2016 թվականի արտադրությանը՝ 2500 դոլար, հսկիչ գինը՝ 5250 դոլար:
«Ես 3500 դոլարով Ամերիկայից անսարք ավտոն առնում եմ, բերում եմ, 2 ամիս ծախսում եմ, անսարք մեքենան սարքում եմ ու նոր ներմուծում Հայաստան: Հիմա ես անսարք մեքենան բերեմ Հայաստան, մաքսազերծեմ հետո հետ տանե՞մ: Այսինքն իրենք ուզում եմ, որ այն փողը, որ ես ներդնում եմ մեքենան սարքելու վրա, դրա 40-50 տոկոսն էլ ուզեն:

Կամ ես մեքենան բերում եմ, տրանզիտ համարներով վաճառում եմ, Հայաստանում չեմ քշում, բնապահպանական վճարն ինչու պետք է վճարեմ»,-ասաց նա:

Ակցիայի մեկ այլ մասնակից էլ նշեց, որ այսօր գործող մաքսազերծման գներից եւս իրենք դժգոհ են. «Այս գները սահմանելու ժամանակ ձայն չհանեցինք, դրա համար հիմա նորից թանկացնում են: Մենք բյուջե փող ենք մուծում, թող ընդառաջեն: Եթե չեն ուզում բյուջե փող մտնի, թող ասեն՝ մենք ձեր թշնամին ենք»: