Արցախի ուղղությամբ Ադրբեջանն անցել է համակարգային գրոհի. Տիգրան Աբրահամյան (video)
«Ադրբեջանական քարոզչամեքենան արշավ է սկսել ռուս խաղաղապահական առաքելության հրամանատար Անդրեյ Վոլկովի դեմ։ Չեմ կարծում, որ ռուս խաղաղապահների գործառույթներում արմատական փոփոխություններ են տեղի ունեցել, ինչից Ադրբեջանը կարող է օբյեկտիվ առումով դժգոհ լինել։ Այս ամենը պայմանավորված է ոչ թե ռուս խաղաղապահների ծառայության էֆեկտիվությամբ, այլ Ուկրաինայի շուրջ ստեղծված իրավիճակով»,–ԱԺ–ում լրագրողների հետ զրույցում նման կարծիք հայտնեց «Պատիվ ունեմ» խմբակցության պատգամավոր Տիգրան Աբրահամյանը։
Հիշեցնենք, որ ադրբեջանական մամուլում լուրեր են շրջանառվում, թե ռուս խաղաղախահներն իրենց գործառույթն ամբողջությամբ չեն իրականացնում, և ադրբեջանական կողմը դժգոհություն է հայտնում։
Նրա խոսքով` քայլերը, որոնք անում է Ադրբեջանն այսօր, նպատակ ունեն հեղինակազրկել ռուսական դերակատարությունն Արցախում և Հարավային Կովկասում։ Սա, ըստ Աբրահամյանի, նշանակում է` որքան այս ճգնաժամը խորանա, այդքան հարձակումները ՌԴ–ի նկատմամբ, ավելանալու են։
Տիգրան Աբրահամյանը նկատեց, որ Հայաստանի ԱԳՆ հայտարարություններն ավելի շատ կապված են Երասխի ուղղությամբ տեղի ունեցող իրադարձություններին, որովհետեւ Հայաստանի տարբեր մարմիններ աշխատում են զերծ մնալ Արցախի վերաբերյալ հայտարարություններ անելուց. «Ես առաջին հերթին նկատի ունեմ ԱԳՆ-ին, կառավարության ղեկավարին: Այս դեպքում այն առաջարկները, որոնք հնչեցնում է Հայաստանի ԱԳՆ-ի միջոցով, մասնավորապես ուժերի հայելային հետքաշման վերաբերյալ, չեմ կարծում, թե այս փուլում կարող է որեւէ խնդիր լուծել, որովհետեւ ադրբեջանական գործողությունները լրիվ այլ տրամաբանության ներքո են, եւ սա նաեւ ազդակ է Հայաստանին եւ Արցախին, որ առաջիկայում կարող են լինել տարբեր բնույթի նոր սրացումներ»,-ընդգծեց նա:
Ադրբեջանն Արցախի ուղղությամբ համակարգային գրոհ է իրականացնում, որն ունի տարբեր բնույթ՝ ռազմականից մինչև հոգեբանական, այդ թվում նաև տնտեսական, որն արտահայտվել է գազատարի պայթյունով, հայտարարեց Տիգրան Աբրահամյանը:
«Ադրբեջանը Արցախի Խրամորթ, Նորշեն, Թաղավարդ բնակավայրերի ուղղությամբ տարբեր բնույթի սադրանքների է դիմում, որոնք ուղեկցվում են հրաձգային զենքերից արձակված կրակահերթերով, փոքր հրետանու և ականանետ կիրառմամբ, ինչպես նաև հոեգաբանական գրոհի իրականացմամբ, որն արտահայտվում է բարձրախոներով, հայկական բնակավայրերի ուղղությամբ մուղամների և զգուշացնող հայտարարությունների տարածմամբ:
Բացի դրանից՝ ադրբեջանցի զինվորականները բարձրախոսով գոռում են, թե մտնելու են և կոտորելու են բոլորին»,-հայտարարեց Աբրահամյանը՝ նկատելով՝ ամենավտանգավորն այն է, որ այս իրավիճակի հետ կապված առ այս պահը Հայաստանի իշխանությունների կողմից որևէ արձագանք չի եղել։
Հիշեցնենք, որ նախօրեից Հայաստանի Հանրապետությունից Արցախ եկող հիմնական գազատարի վնասման հետևանքով Արցախի ամբողջ տարածքը զրկված է գազամատակարարումից։
Ընդդիմադիր պատգամավորի դիտարկմամբ՝ մեծ է հավանականությունը, որ Հայաստանից Արցախ մուտք գործող գազատարի պայթյունը տեղի է ունեցել Ադրբեջանի նախաձեռնությամբ.
«Այս պահին պաշտոնական տեղեկություն դեռ չեն փոխանցում Արցախի իշխանությունները, կան որոշակի մտահոգություններ ու վարկածներ, բայց նկատի ունենալով հանգամանքը, որ Ադրբեջանը թույլ չի տալիս վերականգնողական աշխատանքներ իրականացնել և ըստ այդմ, տեղում որոշակի իրավապահ մարմինների շրջանակներում աշխատանքներ իրականացնել, ապա բնական է, որ այս թեմայով վերջնական եզրահանգում դեռ չկա: Բայց քանի որ գազատարի վերահսկողությունը հիմնականում ադրբեջանական զորքերինն է այդ հատվածում, ապա մեծ է հավանականությունը, որ այդ մասում կարող էր տեղի ունենալ Ադրբեջանի կողմից զուտ ահաբեկչական գործողություն»,-ասաց նա:
Հետևեք մեզ Viber-ում
