shame.am կայքի խմբագրին բերման ենթարկելու որոշում է կայացվել

Դատարանը երեկ  բերման ենթարկելու որոշում է կայացրել shame.am կայքի խմբագիր, «Քաղաքական հետազոտությունների կենտրոն» ՍՊԸ տնօրեն Արտյոմ Խաչատրյանի նկատմամբ: Նրա ծեծի գործն արդեն դատարանում է, սակայն Խաչատրյանը չի մասնակցում նիստերին: Հիշեցնենք,որ  դեռ 2016-ին Shame.am կայքի խմբագիր Արտյոմ Խաչատրյանի ծեծի դեպքով նյութեր էին  նախապատրաստվում: Նշենք, որ ավելի վաղ հայտնել էինք, որ  2016-ի հոկտեմբերի 5-ին Ռադիոմաչտի շրջակայքում գտնվող օբյեկտներից մեկում դաժան ծեծի է ենթարկվել shame.am կայքի խմբագիր, Քաղաքական հետազոտությունների կենտրոն ՍՊԸ տնօրեն Արտյոմ Խաչատրյանը: Դեպքը տեղի է ունեցել երեկոյան: Արտյոմ Խաչատրյանին մոտեցել է նրա ծանոթներից մեկը, որի մասին ինքը գիտեր, որ «Ալյանսի» անդամ է, և առաջարկել է «գնալ խմելու», և նա համաձայնվել է: Օբյեկտում նրանց սպասել են մոտ 15 հոգի: Արտյոմ Խաչատրյանի խոսքով, այդ մարդիկ «Ալյանս» կուսակցության նախագահ Տիգրան Ուրիխանյանի տղաներն են եղել: Ուրիխանյանը ևս օբյեկտում է եղել: Նա պահանջել է ջնջել կայքից իր մասին գրված նյութերը, փոխարենը խոստանալով հետ վերցնել դատական հայցերը, որոնք ներկայում լսվում են Արաբկիր և Քանաքեռ Զեյթուն համայնքների ընդհանուր իրավասության դատարանում: Սակայն Արտյոմ Խաչատրյանը երկարացրել է զրույցը և չի համաձայնվել նրա պայմաններին, որից հետո սկսվել է հաշվեհարդարը: Մենք զրուցել էինք նաև ԱԺ պատգամավոր Տիգրան Ուրիխանյանի հետ, որը հերքել էր ամբողջությամբ իր առնչությունն այս քրեական դեպքին: