Թուրքիայում ձերբակալվել է ռուս ընտանիք՝ Սիրիա անցնելու փորձի համար

lenta.ru-ի փոխանցմամբ, Ռուսաստանի Սարատովի մարզի բնակչուհի Սվետլանա Ուխանովան իր երկու երեխաների և քաղաքացիական ամուսնու հետ ձերբակալվել է Թուրքիայում՝ Սիրիա անցնելու անօրինական փորձի համար: Անթաքիա քաղաքի միգրացիոն բանտ ուղարկված ՌԴ քաղաքացիներին մեղադրում են ծայրահեղական խմբավորումներին միանալու փորձի համար: Սվետլանան իր քաղաքացիական ամուսնու և երկու երեխաների հետ մեկնել է հանգստի՝ Անկարա, որտեղ բնակվում է նրա քույրը: Սակայն ժամանել են նրանք ոչ թե Անկարա, այլ Ստամբուլ, ինչից հետո նրանց հետ կապը կորել է: Ձերբակալվածների հարազատները փնտրում էին նրանց ավելի քան մեկ ամիս: Որոնողական աշխատանքների նախաձեռնողը եղել է Սվետլանայի նախկին ամուսինը՝ Սերգեյ Ուխանովը: Սվետլանան իր հետ Թուրքիա էր տարել նրանց ընդհանուր երեխային: Ազգականների հավաստմամբ՝ Սվետլանան վերջին շրջանում շատ է փոխվել. ընդունել է իսլամ, տարվել է կրոնի ծայրահեղական հոսանքներով, ինչն էլ հանգեցրել է ամուսնու հետ հարաբերությունների խզմանը: Թուրք-սիրիական սահմանը կեղծ փաստաթղթերով անցնելու փորձից հետո ընտանիքին հետ են ուղարկել Ստամբուլ, որտեղից նրանք փորձել են անցնել Բաքու: Ձերբակալվելուց հետո Սվետլանան հրաժարվել է վերադառնալ ՌԴ: Թուրքիա ժամանած նրա նախկին ամուսինն ու մայրը փորձել են տանել երեխային, սակայն թուրքական իշխանությունները պնդում են, որ երեխան ցանկանում է մնալ մոր հետ: