Այս անգամ դիրքեր չեն այցելել

Հրապարակ օրաթերթը գրում է.Երկօրյա աշխատանքային այցով Հայաստանից Արցախ մեկնած ԱԺ պատվիրակությունը հանդիպել է Արցախի նախագահի, ԱԺ նախագահի եւ ՊԲ հրամանատարի, ինչպես նաեւ գործընկերների հետ։ Հատկապես նշանավորվել է Լեւոն Մնացականյանի հետ հանդիպումը, որը տեղեկացրել է, որ ապրիլյան քառօրյա պատերազմից հետո Արցախի պաշտպանության բանակը շարունակում է սահմանի տեխնիկական վերազինման գործընթացը։ Այս պահի դրությամբ էլ տեխնիկապես լիարժեք վերազինում են անցել երկրորդ եւ երրորդ պաշտպանական կորպուսները, գործընթացը շարունակվում է։ Ուշագրավ է, որ այս անգամ պատգամավորները չեն այցելել սահման, ինչն ավանդույթ է դարձել վերջին տարիներին։ Արա Բաբլոյանի այցից հետո Արցախի սահմանակետերից մեկի խոցումը եւ զոհերը դաս են եղել։ Արցախի իշխանությունները որոշել են սահմանափակել պաշտոնական էսկորտների այցերը դիրքեր։ Ի դեպ, «Ելք»-ից ներկայացուցիչ չի եղել պատվիրակության կազմում։ Խմբակցությունից պարզաբանեցին, որ նախապես նամակ է ստացվել Վահրամ Բաղդասարյանի անունից, որ պատրաստվում են մեկնել Արցախ՝ ՀՀԿ-ի նախաձեռնությամբ, ուստի «Ելքը» մերժել է։ Սակայն ավելի ուշ տեղեկացել են, որ այցը կազմակերպել է ԱԺ նախագահությունը, այլ ոչ թե ՀՀԿ-ն։ «Ելք»-ը, հիշեցնենք, ԱԺ-ում որեւէ հանձնաժողով չի ղեկավարում։ Արցախ մեկնած պատվիրակության կազմում են եղել Կարեն Ավագյանը եւ Աղվան Վարդանյանը, առաջինը կրթության, գիտության հանձնաժողովի փոխնախագահն է, երկրորդը՝ ՀՅԴ ֆրակցիայի քարտուղարը, առողջապահության եւ սոցհարցերի հանձնաժողովի փոխնախագահը, ինչպես նաեւ տարածքային կառավարման հանձնաժողովի փոխնախագահ Արայիկ Հովհաննիսյանը, քանի որ նախագահ Վարդեւան Գրիգորյանը երկրում չէ։