Տ. Միքայել արքեպիսկոպոս Աջապահյանը դիտարկվել է որպես նախագահի թեկնածու
Ինչպես հայտնի է, հունվարի 23-ին Արմեն Սարգսյանը հայտարարեց նախագահի պաշտոնից հրաժարական տալու մասին: Սարգսյանի հայտարարությունից հետո մամուլում և սոցիալական ցանցերում սկսեցին տարբեր անուններ շրջանառվել նախագահի հաջորդ՝ հավանական թեկնածուների վերաբերյալ:
Իշխանությունն արդեն ունի նախագահի իր թեկնածուն, սակայն ընդդիմությունը որոշել է թեկնածու չառաջադրել:
Անդրադառնալով այս թեմային, այսօր կայացած իր մեծ ասուլիսի ընթացքում, ՀՀ երկրորդ նախագահ, Հայաստան դաշինքի առաջնորդ Ռոբերտ Քոչարյանն ասել է. «Եթե մենք ուզում ենք ունենալ անաչառ և ազգային շահերով նախագահ, լավագույն տարբերակը կլիներ այս պահին, երբ մեր ազգը բևեռացված է, երբ մարդ է պետք, որ կկարողանա կամուրջներ գտնել, միավորել մեր ազգին, մեր վտանգված ինքնությունը վերականգնել․ լավագույն տարբերակը Հայ առաքելական եկեղեցու՝ որևէ հարգանք վայելող սրբազանն է, հենց այս օրհասական պահին նման թեկնածուն կլիներ լավագույնը»:
hayeli.am-ի ունեցած տեղեկություններով՝ Հայաստան դաշինքի ներսում նման քննարկում եղել է, և մտածել են, որ եթե առաջադրեն նախագահի թեկնածու, ապա այդ թեկնածուն պետք է լինի Հայ առաքելական եկեղեցու ներկայացուցիչ: Այդ հարցը քննարկելու համար Ռոբերտ Քոչարյանը հանդիպել է Վեհափառի հետ և իր մտքերով կիսվել: Կաթողիկոսը խոստացել է հարցը ներսում քննարկել:
Հայաստան դաշինքի ներսում մի քանի թեկանածուի անուն է քննարկվել, նրանց մեջ է եղել նաև Հայ առաքելական եկեղեցու Շիրակի թեմի առաջնորդ Գերաշնորհ Տ. Միքայել արքեպիսկոպոս Աջապահյանը: Հայաստան դաշինքի պատգամավորներ Աղվան Վարդանյանն ու Ագնեսա Խամոյանը, մեր տեղեկություններով, այցելել են արքեպիսկոպոսին, ներկայացրել իրենց որոշումը: Մեզ հայտնի է դարձել, որ Աջապահյանն, ըստ էության, դեմ չի եղել առաջարկին, կարելի է ասել իր հավանությունը տվել է, սակայն Կաթողիկոսից և հոգևորական վերնախավից առայժմ արձագանք չկա:
Հետևեք մեզ Viber-ում
