Գյուղնախարարի անտեղյակությունն ու գյուղացիների հոգսաշատությունը

Գյուղացիների հոգսերից ու գյուղատնտեսությունից կտրված գյուղնախարարի հերթական անտեղյակ հայտարարությունը հարուցել է գյուղացիների զայրույթը։ Իգնատի Առաքելյանն օրերս անդրադառնալով Արմավիրի մարզի Արևիկ և այլ գյուղերում վարունգը անգամ 20 դրամով չիրացնելու հետևանքով զանգվածաբար աղբանոցը թափելուն, նշել էր, որ իրեն բացատրել են, որ սա վարունգի արդեն երկրորդ կամ երրորդ բերքն է՝ շուկայում պահանջարկ չունեցող ու ցածր գնային արժեքով: Մեր խմբագրություն էին ահազանգել Մասիսի հարակից Նորաբաց գյուղի բնակիչները եւ գյուղնախարարի հայտարարության առիթով իրենց վրդովմունքն էին հայտարարում՝ հրավիրելով Իգնատի Առաքելյանին իրենց համայնք․«Թող գա, տեսնի, շփվի գյուղացու հետ, անձամբ մեզանից լսի, որպեսզի ծիծաղելի հայտարարություն չանի։ Ինչ երրորդ, չորրորդ բերք, վարունգի առաջին բերքը 30 դրամով չէին տանում, մնում է ձրի տանք, որ տանեն»,- ասում է գյուղատնտեսությամբ զբաղվող Արամ Կարապետյանը։ Նա ասում է, որ այս տարի վարունգի բերքը շատ է, շատերն են վարունգ մշակել, իրացման շուկան էլ մեկն է՝ Մեմանդարի շուկան, ինչի պատճառով իրացման խնդիր է առաջացել: «Էդ մի շուկան ա, սաղ բերքը տանում են Մեմանդար, դրա համար էլ շատ ա, չի ծախվում։ Ես իմ բերքը չեմ կարում տանեմ, մեքենա չունեմ, ստիպված ինչ գին ասում են, տալիս եմ», - ասում է մեզ ահազանգած գյուղացին։ Նրա կարծիքով գյուղնախարարության անգործության պատճառով է նաեւ, որ նման իրավիճակ է ստեղծվել․«Գյուղնախարարը, գյուղատնտեսության նախարարությունը ինչի՞ համար են, որ քաղաքականություն մշակեն, գյուղացիների հետ խորհրդակցեն ինչը ինքան մշակենք, որ լճացում չլինի։ Թե չէ գյուղնախարարը , հո, մենակ նրա համար չէ, որ ճանապարհ փակենք, գա սուտ խոստումներ տա ու գնա»։ Դեռևս մթերման սեզոնը չմեկնարկած գյուղատնտեսության նախարարն ու նրա ենթակաները խոստումներ էին տալիս մարդկանց, թե չմթերված բերք չի մնա, իսկ հայկական բրենդը՝ ծիրանն էլ կմթերվի կիլոգրամը 400-500 դրամով: Մի կողմից, գյուղնախարարության պաշտոնյաները հայտարարում էին, թե չեն կարող մասնավոր գործարաններին գին թելադրել ու մթերվող բերքի քանակություն սահմանել, մյուս կողմից էլ վերոնշյալ խոստումներն էին հնչեցնում: Վրա հասավ բերքահավաքի շրջանը և անմիջապես ծայր առավ գյուղացի-մթերող կոնֆլիկտը: Անգամ ճանապարհներ փակվեցին։ Արարատի մարզի Ջրաշեն համայնքում ծիրանի առաջին բերքը գնեցին կես գնով քան խոստացել էին՝ 400 դրամով։Սա էլ պատճառ դարձավ, որ գյուղացին փողոց փակի, քանի որ այգիների վրա ծախսած գումարն անգամ այդ գնով իրացնելու պարագայում չէր հանում։ Արմավիրի մարզերում վերջին օրերին գյուղացիները դժգոհում են, որ մթերող կազմակերպություններն աշխատում են անհավանական գներով՝ ծիրանի մթերումը կազմակերպում են 50 դրամով ։ Արարատի մարզում ծիրանի բերքահավաքն արդեն ավարտվել է, ի հեճուկս հայտարարությունների, թե առատ բերք է եղել արարատյան դաշտավայրում, այգետերերը գոհ չեն այս տարվա բերքից։ Արարատի մարզի գյուղացիներից էլ ստացված տեղեկատվության համաձայն` մթերող ընկերություններն ասել են, որ մեկ կիլոգրամ լավորակ ծիրանի դիմաց 70-80 դրամ են վճարելու մարդկանց․«Ծիրանի բերքը շատ չէր, բացի էդ էլ անորակ էր, անցած տարվա դաժան ձմեռվա հետեւանքով ծառերը հիվանդացել էին, բերքն էլ չէր մեծանում։ Էդ բերքը հնարավոր չէր նորմալ գնով իրացնել։ Ֆուռատերերը չտարան, ստիպված 60-70 դրամով իրացրեցինք մթերող գործարաններում» մեզ հետ զրույցում ասաց Արմաշի այգետերերից Վոլոդյա Շահնազարյանը։ Նա ասաց, որ չնայած բերքը քիչ էր, բայց արտահանող կազմակերպությունները գնեցին նախորդ տարիների գնով՝ 800 դրամ․«Էդ գնի ժամանակ էլ համարյա ծիրան չի լինում, քիչ ենք քաղում, մինչեւ ուզում ենք մեծ ծավալ հանձնել, գինը միանգամից իջեցնում են» բողոքեց մեր զրուցակիցը։ Նա ասաց, որ գյուղացին իր հոգսերի, վարկերի հետ մենակ եղել է, մենակ էլ մնալու է, իսկ պաշտոնյաների հայտարարությունները «աչքկապոցի» են: Անի Սահակյան